Qendra Ndërkombëtare e Studimeve Sportive (CIES), në botimin e kësaj jave ka marrë përsipër të rendisë klubet nga pesë ligat më të forta të futbollit në Europë në bazë të vlerës së tregut të lojtarëve që kanë nën kontratë.
Me një vlerë të përgjithshme prej 1.4 miliardë eurosh, renditjen e kryeson Liverpooli. Skuadra e drejtuar nga Jürgen Klopp ndiqet nga një tjetër ekip anglez, Manchester City. Më pas ndjekin dy gjigantët spanjollë Barcelona dhe Real Madrid me katalanasit që kapërcejnë në renditje rivalët e tyre.
Në vendin e pestë pozicionohet Chelsea. Bie kështu në sy rritja e vlerës së “bluve” të Londrës falë shpërthimit të shumë talenteve të rinj, pas pezullimit të merkatos nga FIFA.
Në “top-10” dominon Premier League me plot 5 ekipe, La Liga përfaqësohet nga Barcelona, Real Madridi dhe Atletico Madridi, ndërsa Ligue 1 dhe Seria A kanë nga vetëm një përfaqësues, respektivisht PSG-në dhe Juventusin.
