Teksa na ndajnë 5 ditë nga zgjedhjet vendore në qytetin e Dibrës, debatet në distancë mes kandidatëve kanë arritur kulmin. Për të krahasuar programet elektorale, Sherefedin Shehu nga radhët e demokratëve sfidon me përballje direkte kundërshtarin e tij Muharrem Rama i cili vjen nga koalicioni PS-LSI-PDIU.
Nëpërmjet një bisede telefonike, z. Shehu shprehet për Boldnews.al se ai është i gatshëm që të dalë në një emision televiziv përballë rivalit të tij Muharrem Rama për të shpalosur gjithësecili programin qeverisës për Dibrën.
“Vendin, studion dhe emisionin le ta caktojë vetë kandidati Muharrem Rama. Unë jam i gatshëm të përballem politikisht me të.”- shprehet për Boldnews.al, kandidati i djathtë për Dibrën, z. Sherefedin Shehu.
Zgjedhjet e parakoshme në Dibër erdhën pas skandalit të kryebashkiakut të majtë Shukri Xhelili i cili kërkonte favore seksuale në këmbim të një vendi pune. Këto zgjedhje pritet të mbahen më 11 shtator.
Nga Boldnews.al
