Nga Boldnews.al
Mesazhi zanor që u shfaqet së fundmi abonentëve të kompanisë “Vodafone” me zërin e kryeministrit Edi Rama, është një dëshmi e fortë e kontrollit të tij absolut mbi çdo veprimtari private në Shqipëri dhe, nga ana tjetër, e një “përuljeje” të biznesit të madh që vepron në vendin tonë.
Prej shumë orësh, një pjesë e konsiderueshme e abonentëve të kompanisë celulare “Vodafone”, janë të detyryuar të dëgjojnë mesazhin “inkurajues” për qytetarët, por edhe shantazhues ndaj medias të kryeministrit Edi Rama, para se të kryejnë telefonatën me familjarë apo miq të tyre.
Ndërkohë, shumë abonentë të kompanive të tjera celulare që operojnë në Shqipëri kanë marrë mesazhe me tekst, të njëjtë më atë që klientët e “Vodafone” e kanë marrë në versionin audio.
Nën petkun e mesazheve sensibilizuese për të mbajtur larg korona-virusin me larjen e duarve, kryeministri Rama ka kryer një diskriminim të drejtëpërdrejtë të operatorëve mediatike, kur u drejtohet qytetarëve që të “ruhen nga mediat”.
Përtej qëndrimit të tij agresiv ndaj medias, të cilin e aplikon sa herë është në vështirësi, kryeministri Rama, në rastin konkret, po abuzon me pushtetin politik, nëpërmjet shantazhit apo “joshjes” së kompanive celulare.
Dhe këtë qasje aspak korrekte, Rama po e realizon nëpërmjet shkeljes së ligjit.
Ligji “Për Komunikimet Elektronike në Shqipëri parashikon detyrimin e kompanive celulare që të krijojnë:
-kushte për ofrimin e e rrjeteve të komunikimeve elektronike në rastet e gjendjes së emergjencës apo të gjendjes së luftës;
– përdorimin e rrjeteve dhe shërbimeve të komunikimit nga autoritetet publike, për të paralajmëruar publikun për kërcënimet e pashmangshme nga katastrofat e mëdha dhe për zbutjen e pasojave nga katrastrofat e mëdha;
Në rastin konkret, nuk plotësohen asnjë prej këtyre kushteve ligjore. Qeveria shqiptare, megjithëse ka marrë masa ekstreme për përballimin e përhapjes së korona-virusit, nuk ka nxjerrë apo lëshuar një akt për shpalljen e “gjendjes së emergjencës” e, aq më tepër, të “gjendjes së luftës”.
Po ashtu, mesazhi zanor (por edhe tekst) i kryeministrit Rama, nuk duket se ka qëllim për paralajmërimin e publikut për masat ndaj virusit. Këto paralajmërime jepen në të gjithë organet mediatike dhe profilet zyrtare në rrjetet sociale.
Kushdo në Shqipëri e ka të qartë tashmë situatën, pas informimit të vazhdueshëm mediatik. Por, pikërisht tek media, më saktësisht tek sulmi ndaj saj, qëndron “thelbi” i mesazhit zanor të kryeministrit Edi Rama.
Që ky mesazh nuk përbën “paralajmërim për publikun” shihet qartësisht edhe tek fakti se mesazhi zanor nuk u shfaqet të gjithë abonentëve të kompanive celulare, por vetëm një pjese të tyre.
Pikërisht, ky “diferencim” tregon shumë edhe për mënyrën teknike se si është realizuar përcjella e mesazhit propagandues të Edi Ramës.
1. Mesazhi zanor u ka shkuar një numri të caktuar abonentësh. Kjo do të thotë që ai nuk është vendosur si “pop up” nga Autoriteti i Komunikimeve Elektronike e Postare (AKEP).
Nëse do të kishte ndërhyrë “zyrtarisht” AKEP-i, atëherë ky mesazh zanor do të emetohej në antenat e “Vodafone” dhe do t’u shfaqej të gjithë abonentëve të kompanisë, jo vetëm një numri të caktuar.
2. Natyrisht, nuk përjashtohet mundësia e përfshirjes së AKEP-it në këtë “lojë shantazhuese” të Edi Ramës, nëpërmjet kompanisë “Vodafone”.
AKEP-i, strukturë në varësinë direkte të kryeministrit, pavarësisht se formalisht është “institucion i pavarur”, mund të ketë ndërhyrë me “joshje” ose me shantazh ndaj kompanisë “Vodafone” për të transmetuar mesazhin e kryeministrit.
3. Nga ana tjetër, kompania “Vodafone” duket se ka pranuar të jetë pjesë e “lojës” propaganduese të Edi Ramës, përsa kohë nuk ka asnjë lloj reagimi zyrtar apo rezistence për përdorim anti-ligjor të frekuencave nga kryeministri shqiptar.
4. Disi më ndryshe qëndron situata me kompanitë e tjera celulare, në të cilat mesazhi i kryeministrit shfaqet në formatin “tekst”.
Në këtë rast, stafi i kryeministrit mund të ketë blerë një paketë mesazhesh, të cilat u shpërndahen abonentëve të kompanive celulare. Ose, siç duhet të ketë shumë mundësi, stafi i kryeministrit u ka kërkuar këtyre kompanive në formë “dhurate” mesazhet, të cilat më pas Rama i përdor për qëllime propaganduese dhe shantazhuese.
Në çdo rast, duket qartë që kompanitë e biznesit, e sidomos operatori më i madh i telefonisë së lëvizhshme, “Vodafone Albania”, konsiderohen nga kryeministri Edi Rama si leva për të përmbushur nevojat e tij për të qenë në çdo moment në jetën e shqiptarëve, edhe kur ata janë nën tensionin e ruajtjes së jetës dhe shëndetit nga një virus i rëndë, siç është korona-virusi.
