“Bashkia e Tiranës njofton të gjithë qytetarët se nga dita e enjte, datë 12 mars, do të pezullohet shërbimi i transportit publik për një afat të pacaktuar. Për sa më sipër, prej orës 05:00 të ditës së nesërme, këto linja do të ndërpriten deri në një njoftim të dytë: Shërbimi i transportit qytetas; Shërbimi i transportit rrethqytetas; Shërbimi i transportit ndërqytetas ushqyes”, thuhej në njoftim të Bashkisë së Tiranës shpërndarë për mediat mbrëmjen e së enjtes.
Mirëpo, duket se urdhrat e kryetarit të Bashkisë nuk i kanë marrë parasysh pronarët e kompanive të linjave të transportit urban dhe inter-urban në Tiranë. Që në orët e para të mëngjesit, pak pas orës 05:00, Ora News konstatoi se disa linja urbane në Tiranë vijonin punën normalisht.
Linja si: TEG-qendër, Senatorium, Astiri, Yzberishti, Autotraktori apo Paskuqani, por edhe linja rreth-qytetase kanë vijuar punën normalisht. Fotot në këtë lajm, tregojnë autobusët e linjës së Yzberishtit, të cilët vijojnë punën. Vetëm disa linja duket se kanë vendosur të ndërpresin punën, duke respektuar urdhrin për të shmangur përhapjen e koronavirusit.
https://www.youtube.com/watch?v=U-EYwZwu2I8&feature=emb_logo
