Kryeministri Edi Rama paralajmëroi sot gjatë komunikimit të masave për koronavirusin, se po diskutohet mundësia e pezullimit të transportit urban në Tiranë dhe Durrës. Kjo masë, tha Rama, po parashihet si opsion i vlefshëm në funksion të masave të marra për të parandaluar përhapjen e koronavirusit.
“Po shohim mundësinë e ndalimit të transportit urban në Tiranë dhe Durrës. Kemi eksperiencën e vendeve të tjera, kemi modelet e ndërtuara mbi këtë eksperiencë. Ne nuk ndalim dot përhapjen e virusit, por ka shumë rëndësi se si ndërton të gjithë sistemin mbrojtës. Dhe këto masa janë sistemi ynë mbrojtës që të kemi të gjitha kapacitetet për të shërbyer në momentin e duhur. Ne do të veprojmë siç ka bërë e gjithë bota, nuk do të bëjmë asnjë shpikje”, u shpreh Rama.
