Policia e Shtetit nuk do të lejojë grumbullime të njerëzve në bare, palestra apo rrugë. Është ky urdhëri që i është dërguar drejtuesve të Policisë në qarqe, pas vendimeve të miratuara nga Qeveria në kuadër të masave për të mos lejuar apo minimizuar përhapjen e koronavirusit.
Policia do të ketë detyrë, kontrollin e territorit.
Deri mesditën e djeshme në Shqipëri zyrtarisht janë konfirmuar 10 raste me koronavirus, ku pacientët e parë kanë qenë në Itali dhe janë kthyer në Shqipëri.
Pritet që qeveria të marrë të tjera masa, përveç atyre që janë miratuar deri më sot që nisin me mbylljen e kopshteve, çerdheve, shkollave, bareve të natës, pishinave dhe palestrave. Gjithashtu janë mbyllur kinematë dhe teatrot.
“Nga ana juaj të merren masa për kontrollin e situatës në territor dhe moslejimin e zhvillimit të aktiviteteve me karakter masiv, qofshin ato publike dhe jopublike si: lokale, pub-e, bilardo, palestra, çdo ambient që mbledh dhe grumbullon shumë persona dhe qendra të tjera argëtimi; aktivitete sportive, aktivitete kulturore, konferenca, seminare, teatro, kinema etj; grumbullime të tilla si tubime, manifestime, parakalime, koncerte, dëgjesa publike”, thuhet në urdhrin e Drejtorit të Përgjithshëm të Policisë.
