Kryeministri Edi Rama ka reaguar pas akuzave të PD-së lidhur me shpërndarjen e maskave të skaduara për personelin mjekësor.
Rama ka përgënjeshtruar deklaratat, ndërsa në rrjetet sociale shkruan se ka vetëm një palë maska të dëmshme në Shqipëri: maskat e atyre që dhe kur ky vend lufton me jetën nën gërmadhat e tërmetit apo me një virus kërcënues për planetin, s’ndalen së kërkuari pushtet me shpifje, sherr, rrëmujë!
“Po përsëri Shqipëria do t’ia dalë sepse shqiptarët s’janë vetëm!”, shkruan Rama.
Reagimi i Kryeministrit erdhi pasi PD denoncoi shpërndarjen e maskave njëpërdorimshme të skaduara për personelin mjekësor. Sipas PD-së, këto maska kanë skaduar që në 2011, ndërsa iu kërkua prokurorisë të nisë hetimet.
