Armando Broja, vetëm pak javë më parë, nënshkroi kontratën me skuadrën e parë të Chelsea-t, ndërsa sot debutoi për herë të parë në Premier Ligë.
Sulmuesi 18-vjeçar, u aktivizua në minutën e 86-të duke zënë vendin e Olivier Giroud, ndërkohë që skuadra e tij po fitonte me rezultatin 4-0 kundër Evertonit.
Impakti ishte i menjëhershëm. Në kontaktin e parë me topin në krah të sulmit, arriti të zbresë shpejt dhe të fitojë një rivënie anësore, ndërsa në prekjen e dytë të sferës, shtangu mbrojtësin Holgate, i cili e ndali më pas me një ndërhyrje shumë të rëndë, që i kushtoi kartonin e verdhë.
Pikërisht nga kjo goditje dënimi Broja pati shansin të shënojë edhe golin e parë si profesionist me fanellën e Chelseat, por topi i ardhur në zonë nuk u arrit për çështje milimetrash, ndërsa në fund shtatlarti i Kombëtares Shqiptare mori edhe komplimentet e shokëve të skuadrës.
