Nga Boldnews.al
Vetëm pak muaj pas largimit demostrativ të Ilir Kërnit nga TKOB dhe emërimit të Zana Çelës në krye të këtij institucioni, Ministria e Kulturës hedh një hap tjetër. Një tender prej rreth 10 miliard lekësh është vënë në dispozicion të Zana Çelës për rehabilitimin e “Teatrit Kombëtar të Operas dhe Ansamblit Popullor”.
Njoftimi u bë fillimisht nga Ilir Kërni nëpërmjet një statusi në profilin e tij në facebook ku përveç dorëheqjes së tij nga ky institucion, shprehu edhe kënaqësinë e alokimit të një fondi të qeverisë shqiptare për hapjen e një tenderi për rikonstruksionin e TKOB.
Si për inat, pak ditë pas dorëheqjes së Kërnit, kryeministri Edi Rama publikon fotot e projektit të rikonstruksionit të TKOB duke tentuar të sfumoj meritat e ish drejtorit i cili e ka kërkuar vazhdimisht këtë gjë. Me anë të një statusi në facebook, Rama e cilëson rikonstruksionin e TKOB si një ambicie për qeverinë dhe për Shqipërinë e Gjeneratës Tjetër.
Edhe në faqen e agjencës së prokurimit publik është bërë e ditur hapja e tenderit ndërkohë që pranimi i ofertave mbyllet më 23 shtator të këtij viti. Projekti parashikon rehabilitimin e të gjithë institucionit kulturor, duke nisur që nga rrethimi, sistemi elektrik, ndriçimi, platëforma e publikut, ndryshimi i dyshemesë dhe tavanit, vendosja e ashensorëve, vendosja e një fonie modern etj.
Por projekti për rikonstruksionin e TKOB nuk është pritur mirë nga artistët. Më herët, regjisori TKOB, Nikolin Gurakuqi është shprehur se teatri po humbet identitetin duke u kthyer në një sallë koncertesh.
“Problemi është që a do të bëhet teatër apo filarmoni? Me atë çfarë kam parë në faqen e Ministrisë së Kulturës në foto ai nuk është teatër, duket si sallë koncertesh. Aty nuk duket as gropë orkestre, as një skenë teatri operistike. Në ato foto duket vetëm një sallë koncertesh. Nëse do të bëhet një sallë koncertesh, ku shkojnë trupat? Ku shkon institucioni, i cili ka mbi 60 vjet i themeluar dhe mbahet me thonj, me djersë, mund, me artistë të mëdhenj, mesatarë dhe të vegjël, secili në vendin e vet. Gjithë ai produksion operistik i bërë gjithë këto vite ku shkon? Pra kush do të na sqarojë për këtë projekt? Qofsha i gabuar, por më duket si teatër filarmonie, jo teatër opere.”– është shprehur më herët, Gurakuqi.
Rikonstruksioni i Teatrit të Operas dhe Baletit ishte parashikuar të niste që në janar të këtij viti, por ish drejtori i TKOB Ilir Kerni bëri me dije se ky rikonstruksion u shty për arsye teknike.
Tashmë mbetet në dorë të drejtoreshës së re të TKOB, Zana Çela që të marrë fatet e rikonstruksionit të këtij institucioni të rëndësishëm kulturor. Për këtë ka mbështetjen e fuqishme të Ministres së Kulturës Mirela Kumbaro dhe kjo u pa gjatë prezantimit të Zana Çelës, ku ministrja u kërkoi artistëve ta mirëprisnin drejtoreshën e re të TKOB ashtu siç bënë me Kernin tre vite.
