Rastet e prekurve me koronavirus në vendet fqinje me Shqipërinë, dhe në Rajon, vijojnë të rriten. Ndërkohë, nga Ministria e Shëndetësisë konfirmohet se në vend, nuk ka asnjë të prekur me virusin që u shfaq për herë të parë në Huan të Kinës.
Në Itali, 1,049 persona kanë rezultuar aktualisht pozitivë me koronavirus, duke e bërë shtetit më të prekur në Europë. Këtyre u shtohen 29 persona që humbën jetën, kryesisht të moshuar dhe të prekur nga patologji të tjera, dhe 50 të cilët u shëruan. Lombardia dhe Veneto janë rajonet më të prekura, megjithatë virusi ka marrë një shtirje në të gjithë vendin.
Në Greqi, mediat raportojnë për 7 raste të konfirmuara me koronavirus. Pacientet po mjekohen në spitale në Athinë dhe Selanik.
Në Kroaci po ashtu është rritur numri i të infektuarve. Autoritet kroate kanë konfirmuar se ashtu si në Greqi, numri i personave të prekur në vendin Ballkanik janë 7, 4 persona nga Rijeka dhe 3 nga Zagrebi.
Në Maqedoni, autoritet njoftuan se numri i të infektuarve nuk është rritur. Pacienti 50-vjeçar që po trajtohet në Klinikën e Sëmundjeve Infektive në Shkup mbetet rasti i vetëm në vend deri më tani.
Përveç Greqisë, Italisë dhe Maqedonisë së Veriut, fqinjët e tjera të Shqipërisë, Kosova dhe Mali i Zi, mbeten të paprekura nga koronavirusi.
Në rang global, raportohet për më shumë se 86.000 të infektuar.
/BoldNews.al/
Këshilla nga MSH: Si të mbrohemi nga koronavirusi
