Kur na ndajnë vetëm pak ditë nga 2 marsi, datë në të cilin presidenti Ilir Meta ka thirrur qytetarët që të marrin pjesë në një manifestim kombëtar, kundër atij që ai e cilëson grusht shteti, vjen një koment nga kryeministri Edi Rama, i cili nuk e kursen aspak ironinë.
Teksa ishte i pranishëm në aktivitetin ku po prezantohet projekti për rindërtimin e banesave të dëmtuara nga tërmeti i 26 nëntorit, Rama nuk i kursehu ironitë, ndërsa theksoi se Presidenti ka shtëpi, ndërsa ai ishte aty për ata që jetonin në çadra. Në këtë linjën ai theksoi se ishte luks i madh për të që të merrej me Presidentin.
“Presidenti e ka shtëpinë. Më shumë se një shtëpi. Unë jam këtu për ata që jetojnë në çadra dhe presin që të futen në shtëpinë e tyre. Për ata jam unë këtu, jo thjesht në këtë konferencë, por në të gjitha orët e ditës time me gjithë natën. J’ua kam lënë juve çështjen e Presidentit, unë nuk merrem me Presidentin. Është shumë luks i madh për mua të merrem me Presidentin.”, tha ai.
