Një grua është vrarë me levë në Durrës këtë të mërkurë. Burime policore bëjnë me dije se ngjarja ka ndodhur pranë “Pallatit të Sportit”, brenda një dyqani metrazhesh, ku Hajdije Tosuni, 59 vjeçe është qëlluar me levë nga i shoqi Ruzhdi Tosuni, 63 vjeç, dhe ka ndërruar jetë.
Raportohet se para se ta qëllonte, mes gruas dhe burrit, ka pasur një konflikt verbal.
Grupi hetimor ka shkuar në vendngjarje, ndërsa policia ka arrestuar autorin.
“Rreth orës 11:35, në lagjen Nr. 12, Durrës, shtetasi Ruzhdi Tosuni, 63 vjeç, banues në lagjen Nr. 7, Durrës, në dyqanin që tregton metrazhe, dyshohet se ka vrarë me levë hekuri, bashkëshorten e tij, shtetasen Hajdije Tosuni, 59 vjeçe, e cila ka ndërruar jetë si pasojë e plagëve të marra. Shërbimet e Policisë kanë arrestuar në flagrancë autorin e dyshuar të ngjarjes. Në vendngjarje ndodhet grupi hetimor, ku vijon punën për sqarimin dhe dokumentimin e ngjarjes”, njoftoi policia.
Vajza e çiftit është shfaqur në gjendje të rënduar psikologjike para dyqanit të metrazheve ku ndodhi krimi.
Po sot, një burrë 77 vjeç ka mbetur i plagosur rëndë me thikë në Vlorë.
Ndërkohë, dje në Mirëditë, Fatmir Kolecaj vrau me armë zjarri ish-gruan dhe vëllanë e saj.
/BoldNews.al/
