Përhapja e virusit shkatërrimtar edhe në zona të veçanta të Italisë ka vënë në alarm qeverinë dhe institucionet shëndetësore të vendit. BBC shkruan se Italia ka prezantuar “masa të jashtëzakonshme” për të trajtuar përhapjen e shpërthimit më të madh të koronavirusit të ri në Evropë. Kryeministri Giuseppe Conte në orët e vona të mbrëmjes së të shtunës ka njoftuar një plan urgjence, pas informacioneve se numri i të prekurve ka arritur në 79.
Masat u vendosën pasi dy shtetas italianë u konfirmuan se kishin vdekur nga virusi. Ndërkohë rreth 12 qytete në rajonet veriore të Lombardisë dhe Veneto janë karantinuar në mënyrë efektive sipas planit.
Rreth 50,000 njerëzve nga qytete në dy rajone veriore u është kërkuar të qëndrojnë në shtëpi nga autoritetet. Z. Conte tha se tani do të ishte e ndaluar të futesh ose të lësh zonat e shpërthimit, përveç nëse u jepet leja speciale.
Të gjitha aktivitetet shkollore dhe sportive janë pezulluar në ato zona, përfshirë disa ndeshje futbolli në Serie A që do të zhvilloheshin këtë të diel. Policia, dhe nëse është e nevojshme forcat e armatosura, do të kenë autoritetin të sigurojnë që rregullat të zbatohen.
Autoritetet italiane kanë frikë se virusi ka shkuar përtej grupimeve të izoluara të rasteve në Lombardi dhe Veneto, duke e bërë të vështirë kontrollimin e tij. “Infektimi i këtij virusi është shumë i fortë dhe mjaft virulent,” tha shefi i shëndetit të Lombardisë Giulio Gallera.
Koronavirusi i ri ka origjinën në provincën kineze Hubei vitin e kaluar, por është përhapur në 26 vende, ku janë konfirmuar më shumë se 1.400 raste dhe 11 vdekje.
