Ben Blushi deklaron se nuk beson se do të ketë zgjedhje të parakohshme, ndërsa për zgjedhjet në PS u shpreh se “Rama kërkon mandat të përjetshëm”. Këto deklarata kandidati potencial për në krye të PS-së, deputeti socialist Ben Blushi i ka bërë gjatë emisioni “Zonë e lirë” të Arian Çanit, ku ka folur për të gjitha çështjet e diskutuara. “Edhe mbrëmë te Fevziu nuk iu përgjigj pyetjes nëse do të largohet nëse do të humbiste zgjedhjet, pra ai po kërkon një mandat të përjetshëm, mund të mos bëjë zgjedhje edhe për 20 vite”, tha ai.
ELBASANI
Ben Blushi u shpreh se i është censuruar me qëllim fjala gjatë takimit në Elbasan “Më kanë shkëputur vetëm disa fragmente ku isha me nerva, pasi disa persona në rreshtin e parë po bërtisnin. Po flisja me zë të lartë që të dëgjohesha. Fjalimi im është censuruar”, ka thnnë ai.
Lidhur me kundërshtitë e Blushit dhe ngjarjet në Elbasan, i pyetur nga Arian Çani nëse e shikonte veten si delja e zezë në parti, deputeti i PS u shpreh “Edhe nëse jam, kjo e zbukuron tufën”.
Blushi si rrallëherë ka treguar edhe barsaleta gjatë intervistës. Ai tregoi barsaletën e 4 shokëve që nisën të përcjellin njërin prej tyre me tren por ikën vetë. Shiheni në video këtë moment.
“Arsyet për të cilat erdhëm në pushtet nuk ekzistojnë”, më u shpreh Ben Blushi. “Unë nuk dua që PS të bjerë nga pushteti, por të qeverisim më mirë, të garantojë më shumë barazi për të varfërit. Prandaj unë kërkoj që të votohem në PS, pro ose kundër si të duan, dua vetëm të votohem. Është koha për zgjedhje, por thonë zgjedhje nuk ka. Kërkoj që të ndryshojë kjo gjendje, sot jemi në deflacion”, tha ai.
CHECK UP QEVERISË
Kandidati për kreun e PS, Blushi i ka bërë qeverisë një “Check-up”-i falas duke prekur disa nga problemet themelore të qeverisjes që lidhen me krizën ekonomike.
“Borxhi është rritur, edhe ai që vdes ka lënë pas një borxh pa larë, çdo person duhet që të paguajë dy vite për të larë borxhin e shtetit, eksportojmë më pak, papunësia është rritur, kriza është thelluar, mblidhen më pak të ardhura, shoqëria është asfiksuar. Jemi të dytët pas Sirisë për largimet, ata largohen nga vendi i tyre nga lufta, ne nga papunësia”.
PSE DRIDHEJ RAMA NË OPINION?
Eshtë komentuar shumë gjesti i Ramës që lëvizte këmbën gjatë gjithë kohës dhe sidomos kur fliste për Blushin gjatë intervistës së enjtes në “Opinion”. Nuk e ka lënë pa e komentuar as Ben Blushi këtë fakt. Ai thotë se Rama ishte në ankthin e garës.
Çani: Ka dy vjet që nuk ta përmend emrin. Këmbën e dridhte kur fliste për ty…
Blushi: Është ankthi i një njeriu para një gare.
Çani: Nuk ka garë?
Blushi: Në çdo kuptim ka një garë. Më vjen keq që është aq në ankth. Kjo është e vetmja gjë që do të mbahet mend nga ai emision. Shpresoj të mos jetë ngjitëse, se do të dalin të gjithë. Do të kthehet ngjitëse në Parlament, të gjitha ata që flasin kundër meje do ta bëjnë këmbën ashtu. Kam frikë mos kthehet në detyrë partie.
Blushi ka komentuar shprehjen e Ramës në Opinion se Shqipëria dhe Partia janë si mami me babin. “Pra babi është Shqipëria dhe mami është partia, por sa parti ka Shqipëria dhe babi i bie që të shkojë me shumë parti…Askush nuk duhet të ketë dilemë që të zgjedhë mes Shqipërisë dhe partisë”, tha Blushi.
PS nuk është demokratike dhe kjo nuk i shërben Shqipërisë. Partia po e dëmton Shqipërinë, ndërsa Shqipëria nuk ka mundësi që të dëmtojë partinë, vijoi argumentin e tij Blushi.
(Boldnews)
