Komisioni i Sigurisë miratoi formalisht Aktin Normativ të Qeverisë mbi anti-KÇK.
E pranishme në mbledhjen e Komisionit ishte edhe zv.ministrja e Brendshme, Rovena Voda, e cila tha se me krijimin e OFL-së i është dhënë frymëmarrje punës së Policisë së Shtetit duke shtuar se Akti Normativ shoqërohet me një sërë nënaktesh të tjera si dhe njoftoi se në mbledhjen e ardhshme të qeverisë kjo paketë do të kalojë.
“Me këtë akt i kemi dhënë më tepër frymëmarrje Policisë për të kryer investigime në punën e saj. Institucionet shtetërore duhet të japin kontribut në punën e Policisë së Shtetit. Akti normativ shoqërohet me një sërë nënaktesh të tjera, në mbledhjen e ardhshme të qeverisë kjo paketë do të kaloj, kjo strukturë do të ketë edhe strukturat e saj në drejtoritë vendore të Policive nëpër qarqe. Aksesi në databaze, nuk është deklarative, policia ka akses në te dhëna që nuk ka patur akses më para”, tha Voda.
Gjatë diskutimeve në Komision ka folur edhe deputeti Spartak Braho, sipas të cilit, krimi është bërë i rrezikshëm me mënyrat e tij të sofistikuara duke argumentuar nga ana tjetër, se e këtë Akt Normativ, synohet kontrolli i pasurive të subjekteve kriminale.
Braho theksoi se ndaj personave që kanë futur duart deri në brryl apo deri në krahë, duhet të veprohet në kushtet e emergjencës.
“Krimi i organizuar është sofistikuar, është bërë i rrezikshëm, me këtë akt synohet kontrolli i pasurive të subjekteve kriminal, nëse ka persona që kanë futur duart deri në brryl apo deri në krah do të veprohet ndaj tyre, në kushtet e energjencës kundër kriminalitetit kemi gjetur këtë akt, habitem me një gjë, ‘Edi Rama po ben grusht shteti’ kjo është qesharake, grushtin e shtetit e bën opozita jo Rama, Rama e ka pushtetin, si mund të bëj mazhoranca grusht ndaj vetës së saj. Mos diskreditoni këtë akt normativ, bëni kujdes, kjo është porosia ime për ju”, u shpreh Braho.
Vite më parë, kohë kur u publikua video-përgjimi Prifti-Meta, Braho ishte një nga mbrojtësit më të zjarrtë të Presidentit aktual.
