Pasagjerët e avionit të linjës ajrore Tiranë-Milano kanë kaluar momente tmerri ditën e sotme, pasi avioni me të cilin po udhëtonin pësoi defekt në ajër.
Avioni i kompanisë “Blu Panorama”, mësohet se është nisur sot rreth orës 13:30 nga aeroporti i Rinasit për në Milano, por nuk ka mundur ta vijojë udhëtimin për shkak të një defekti teknik, duke u rikthyer në Rinas.
Bëhet e ditur se avioni i linjës ajrore Tiranë-Milano fluturoi rreth 19 minuta, por pasi pësoi defekt u ul sërish në Rinas. Ndërkohë 90 pasagjerët u njoftuan se do mund të udhëtonin sërish brenda një kohe të shkurtër.
Por kjo nuk është hera e parë që ndodh që kjo kompani të ketë probleme të tilla se për vonesa, ato janë bërë të zakonshme. Më e fundit ka ndodhur dy ditë më parë. Avioni i Blue Panorama ishte përcaktuar të nisej nga aeroporti “Leonardo Da Vinci”, Fiumicino mbrëmjen e së dielës në orën 20:45 drejt aeroportit “Nënë Tereza”, Rinas por për shkak të disa problemeve të paqarta, nisja u shty për në orën 22:50.
Por nuk mbaroi këtu aventura e rreth 100 pasagjerëve. Ndërsa ata janë akomoduar në vendet e tyre për t’u nisur drejt Tiranës, gjatë testimit përfundimtar avioni ka dhënë defekt në sistemin e ajrit. Kjo ka bërë që avioni të mos niset. Udhëtarët kanë zbritur sërish nga avioni dhe kanë pritur deri në orën 06:30 të ditës tjetër në ambientet e aeroportit për t’u nisur nga Italia drejt Shqipërisë.
Kompania madje nuk iu ka siguruar as hotel dhe as dëmshpërblim, pavarësisht se kjo gjë është kërkuar nga udhëtarët. E vetmja gjë që kanë marrë ka qenë një vakt ushqim, një shishe ujë dhe një batanije për të kaluar natën në aeroport. Situata ka alarmuar jo pak familjarët e dhjetëra pasagjerëve dhe madje edhe stafit të avionit. Nga ana e autoriteteve në Tiranë nuk ka patur asnjë komunikim apo sqarim për situatën, ndërsa nga pala italiane ka patur informacion vetëm për orarin tjetër të nisjes.
Fatmirësisht pasagjerët mbërritën shëndoshë e mirë në destinacion, ndonëse të stërlodhur por nuk dihet se cfarë mund të ndodhë në udhëtimin tjetër, duke parë edhe episodin e tmerrit të ndodhur sot me këtë linjë!!!
(Boldnews)
