Gërmadha dhe baltë, është gjithcka që ka mbetur nga stadiumi i vjetër “Qemal Stafa”. Boldnews.al ka siguruar foto nga pjesa e brendshme e sipërfaqes ku do të ndërtohet Arena Kombëtare, ku duken dhjetëra automjete duke punuar, ndërsa nga stadiumi i mëparshëm nuk ka mbetur asgjë. Grumbuj të mëdhenj me inerte dhe makina që shkojnë e vijnë brenda kësaj hapësire ku pas disa muajsh do të ngrihet dhe do të luhet futboll, por jo vetëm.
Stadiumi i ri që do të zëvendësojë stadiumin “Qemal Stafa”, të ndërtuar fillimisht në vitin 1946 dhe të rinovuar më vonë në 1974 do të ketë edhe një kullë të projektuar në anën veriore të stadiumit, ku pjesa e sipërme do të shërbejë si restorant ekskluziv i stadiumit dhe një studio televizive transmetimi.
Kompleksi i ri , me një sipërfaqe të ndërtuar prej 43.000 metra katrorë (duke përfshirë 25.000 metra katrorë funksione të dedikuara për stadiumin, 10.000 metra katrorë për zyra dhe 8.000 metra katrorë për pakicë komerciale), është parashikuar si një strukturë e integruar.
Stadiumi ri i Tiranës është parashikuar të përfundojë në vitin 2018. Ky stadium është parashikuar të jetë 22.500 vendësh dhe me të gjitha tribunat e mbuluara. Projekti ka parashikuar që veç funksionit si stadium, kjo godinë do të përmbajë rreth 14.000 metra katrorë qendër biznesi dhe facilitete të tjera, ndërsa 4000 metra katrorë do të jetë një sipërfaqe në dispozicion të Federatës Shqiptare të Futbollit për zyra dhe nevojat e saj.
