Operacioni Forca e Ligjit (OFL) ka publikuar emrat e dy personazheve të tjerë, që u është lënë afat 48 orë për të deklaruar pasurinë.
Zëdhënësja e OFL-së është shfaqur me të njëjtën pamje, me syze të zeza, për të lexuar deklaratën e rradhës, e cila ka zgjatur disa sekonda.
“Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
– A. K., banues në Durrës, i dënuar në Gjermani për vepra penale në fushën e narkotikëve;
– B. P., banues në Koplik, Shkodër, i dënuar në Belgjikë për trafik të qenieve njerëzore;
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së”, tha Zëdhënësja e OFL.
Shtetasi A.K mësohet se është Alberto Lame, i cili mban mbiemrin e bashkëshortes së tij, Kochsiek. Ai dyshohet se bashkë me disa shqiptarë të tjerë transporonin kokainë nga Ekuadori, në kuti bananesh për të furnizuar qytetet gjermane. Më 2018 një ngarkesë 1.8 ton kokainë u kap në Gjermani e cila vinte nga Ekuadori me vlerë tregu prej 400 milionë euro. Në këtë operacion u përfshinë 500 hetues dhe forca policore gjermane për të arritur në arrestimin e 13 shqiptarëve dhe tre të huajve.
Shtetasi B.P mësohet se është Bardhok Pllanaj, të cilit në vitin 2018, iu sekuestrua një pallat 10-katësh me vlerë 2 milionë euro. Burimi i pasurisë dyshohej se rridhte nga aktiviteti kriminal. Pllanaj rezulton i dënuar në Gjermani për trafik lëndësh narkotike.
Në vijim, ajo sqaroi se të gjithë personat që iu është dërguar kërkesa me shkrim për vetëdeklarimin e burimeve të pasurisë, i kanë plotësuar formularët dhe i kanë dorëzuar të gjithë pranë OFL-së, e cila ka vijuar me procedurat sipas përcaktimit në aktin normativ nr. 1 , të datës 31 janar 2020.
