Forcat Speciale të Ndërhyrjes së Shpejtë, të mbështetura nga apo Shqiponja, Policia Kriminale, Shigjetat, Patrullat e Përgjithshme dhe Policia Rrugore, kanë vijuar kontrollet në qytetet kryesore në vend, ku në fokus kanë qenë ato që konsiderohen si makina luksoze.
Policia, përmes një video që ka publikuar në rrjetet sociale, bën të ditur se kontrollet janë zhvilluar në akset kryesore dhe rrugët e qyteteve të mëdha.
“Dhjetra pika kontrolli me orare të shkurtra ditën dhe natën dhe kontrolle të befasishme në lëvizje po vijojnë prej 96 orësh në të gjitha qarqet e vendit nga FNSH-të, Policia Kriminale, Shqiponjat, Shigjetat, Patrullat e Përgjithshme dhe Policia Rrugore”, bën me dije policia.
Ende nuk ka një bilanc se çfarë ka gjetur policia nga kontrollet e realizuara, sa elementë kriminalë ka ndalur, sa automjete luksoze ka bllokuar për verifikim, megjithëse ka pasur një angazhim të qindra forcave policore në operacione kontrolli.
Nga video e publikuar shihet se në postoblloqet e ngritura ka policë me maska dhe me armë automatike, që ndalojnë kryesisht automjetet luksoze dhe ushtrojnë kontrolle.
