Operacioni Forca e Ligjit bëri të ditur se i ka dorëzuar formularin e vetëdeklarimit shtetasit P.D me banim në Durrës, pasi rezulton në hetim në Gjermani për veprën penale “Trafik i qenieve njerëzore”. Nga të dhënat e OFL rezulton se ky shtetas është Plarent Dervishaj, kunati i Lulzim Berishës, i cili një ditë më parë depozitoi formularin e vetë-deklarimit të pasurive.
Plarent Dervishaj në prill të vitit 2015, edhe pse ishte një nga personat më të kërkuar nga Interpol dhe FBI, (dyshohej se fshihej në SHBA), u shpall i pafajshëm nga Gjykata e Apelit për Krimet e Rënda, edhe pse akuzohej për të paktën vrasjen e katër personave dhe plagosjen e tre të tjerëve. Ndërsa në korrik të 2019, Plarent Dervishajt iu bë një atentat në Durrës, në rrethrrotullimin e Kënetës, ku mbeti i plagosur së bashku me shtetasin Julian Meçaj.
Gjithashtu i është kërkuar formulari shtetasi S.Ç, me banim në Elbasan, pasi rezulton i dënuar në Itali për trafikim narkotikësh. Nga burimet e OFL mësohet se ky shtetas është Suel Çela.
Suel Çela, djali i biznesmenit Petrit Çela, është akuzuar dhe se me automjetin e tij tip “Audi” i blinduar goditi makinën e ish-zv/drejtorit të Policisë së Elbasanit, Gjergji Oshafi në hyrje të tregut industrial, ngjarje kjo e regjistruar në shtator të vitit 2017. Në nëntor të vitit të kaluar ai mori pafajësinë nga Krimet e Rënda.
“Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së. Më pas, përgjigjet e marra do t’i dërgohen SPAK-ut, i cili brenda jo më shumë se 15 ditësh, duhet të vlerësojë dosjen e përgatitur nga OFL-ja mbi aktivitetin kriminal të këtyre subjekteve, si edhe pasurinë e tyre.
Sapo të bëjë këtë vlerësim, SPAK-u duhet t’i kërkojë Gjykatës Speciale masën e sekuestrimit për pasuritë e subjekteve dhe pas sekuestrimit, në jo më shumë se 6 muaj Gjykata Speciale duhet të vendosë për konfiskimin përfundimtar të tyre.
Me marrjen e masës së sekuestros, çdo pronë e subjekteve do të administrohet nga agjencia e posaçme. Vetëm banesa mund të vazhdojë të përdoret për strehim, por nuk mund të shitet apo të jepet me qira nga subjekti”, thuhet në njoftimin e OFL-së.
