Nga BoldNews.al
Ditën që Olsian Çela u zgjodh Prokuror i Përgjithshëm, “Boldnews.al” përmendi se, një ndër sfidat e tij të para politike do të jetë edhe qasja e tij përballë paketës “Anti-KÇK” të kryeministrit Edi Rama, e cila po draftohej në Dhjetor 2019 dhe hyri në fuqi në 31 Janar 2020.
Paketa “Anti-KÇK” bie ndesh, në shumë pika, me Kodin e Procedurës Penale dhe pritet t’i vendosë para vështirësive prokurorët se cilin akt duhet të zbatojnë.
Logjikisht, Kodi i Procedurës Penale prevalon mbi çdo ligj tjetër, përfshirë Aktet Normative të Qeverisë. Por, në një situatë presioni prej Vetingut, prokurorë të ndryshëm mund të zgjedhin t’i “bëjnë qejfin” kryeministri Edi Rama, ndërsa të tjerë mund të zgjedhin t’i qëndrojnë stoikë parashikimeve të Kodit Penal.
Pikërisht, për të shmangur një situatë të tillë, Prokurori i Përgjithshëm ka tagrin ligjor për të nxjerrë Udhëzim të Përgjithshëm dhe detyrues për të gjithë prokurorinë e juridiksionit të përgjithshëm.
Nga ana tjetër, edhe drejtuesi i SPAK-ut, Arben Kraja, ka mundësinë ligjore për të nxjerrë një Udhëzim të Përgjithshëm, në bazë të të cilit të orientohen prokurorët specialë se cilin akt ligjor duhet të zbatojnë.
Këtu pritet të jetë sfida e dy drejtuesve të lartë të Prokurorisë Shqiptare. Do t’i qëndrojnë strikt Kodit të Procedurës Penale, duke mbajtur një qëndrim që bie ndesh me “hovin kryeministror” të Edi Ramës, apo do të zgjedhin që t’i përulen pushtetit të Shefit të Kabinetit Qeveritar dhe të pranojnë zbatimin e paketës “Anti-KÇK”?
Paketa “Anti-KÇK”, siç njihet ndryshe Akti Normativ i Qeverisë për “Masat Parandaluese kundër krimit të organizuar”, përfshin një seri parashikimesh, të cilat bien ndesh me Kodin e Procedurës Penale dhe parimin e ndarjes dhe balancimit të pushteteve.
Nëpërmjet këtij Akti Normativ, qeveria vendos që t’i japë Policisë së Shtetit kompetenca, të cilat Kodi i Procedurës Penale ia njeh më së pari prokurorit e, më tej, gjykatës.
Akti Normativ parashikon që, me urdhër të Drejtorit të Përgjithshëm apo të drejtorëve të tjerë lokalë, Policia të kryej përgjime, të ndalojë lëvizjen apo të vendosë sekuestro të pasurive të personave të dyshuar si të përfshirë në krim të organizuar, të familjarëve të tyre apo të bashkëpunëtorëve në biznes.
Akti Normativ parashikon që këto nisma të Policisë, të vlerësohen më tej nga prokuroria dhe në fund nga gjykata.
Por, parashikimet e Aktit Normativ, të cilat i japin super-fuqi Policisë së Shtetit, tejkalojnë pozitën e prokurorit, të njohura nga Kodi i Procedurës Penale.
