Nga Boldnews.al
Nëse do kishte qoftë edhe një fije të hollë morali dhe përfaqësimi, kryeministri Edi Rama duhet të ishte çuar menjëherë nga “dhoma e intervistës”, pikërisht në momentin që u pyet për shitblerjen e votave.
Është fort e rëndë që kryeministri i cili në vendin tonë shet propagandë dhe në botë shfaqet si “lider global”, pyetet nga gazetarët e huaj për fenomenin e shitblerjes së votave. Ky personazh që drejton presidencën e OSBE-së, që në thelb ka demokracinë, ndarjen e pushteteve dhe zgjedhjet e lira dhe të ndershme, ka futur vendin e tij në një qorrsokak ku vetëm të marrët nuk e kuptojnë.
“Përsa i përket blerjes së votave unë nuk e diskutoj problemin. Ky fenomen ka rënë ndjeshëm dhe kurrë nuk ka qenë kaq i fortë sa të ketë ndryshuar rezultatet e zgjedhjeve”-tha Rama për gazetën Spigel në Gjermani. I pyetur më tej se: A jeni përfshirë personalisht në blerjen e votave?-Rama iu përgjigj: “Jo. Vitin e kaluar unë padita gazetën “Bild’’ për këtë pretendim. Procesi është ende në vazhdim”.
Ai bën dy mashtrime të njëpasnjëshme, i qetë, me delirin e madhështisë dhe me cipën e moralit të shprishur prej kohësh. Së pari, shprehet se fenomeni i shitblerjes së votave ka rënë ndjeshëm. Ky është nga ato mashtrime që edhe vetë Rilindja nuk e beson, madje ajo më shumë se të tjerët pasi është dëshmitare sesi me grafikë në duar, në zona të ndryshme të Shqipërisë rendnin me tufa parash për të blerë varfërinë, e siguruar pushtetin për katër vite.
Nuk u mjaftoi vetëm krimi i shitblerjes së votave, por pranë vetës morën edhe personazhe të botës së errët të krimit duke i përfshirë në politikë.
Krimi pasi siguroi parënë e pistë, që vinte nga droga dhe prostitucioni u “pastrua” në oazin e Rilindjes, duke veshur kostumin e deputetit, të kryebashkiakut apo të drejtorëve në të gjithë administratën e lartë shtetërore.
Mashtrimi i dytë lidhet me deklaratën se ka paditur gazetën “Bild”, deri pak javë më parë kjo është një e pavërtetë e madhe, e cila është konfirmuar si nga gazeta ashtu edhe gazetari Piter Tiede se nuk ka një procedim ndaj tyre, ndonëse Rama kishte premtuar se kontaktoi avokatë për të nisur procesin.
