Gjirokastra nuk heq dorë nga kanabisi. Një tjetër vend ku kultivohej lëndë narkotike është zbuluar na policia në zonën industriale të Gjirokastrës në kuadër të operacionit të koduar “Aspiratori”. Magazina ishte nën tokë, ku hyjen nëpërmjet një kapaku metalik i vendosur përdhe.
Kanabisi sipas burimeve zyrtare nga policia ishte mbjellë në një magazinë që ishte marrë me qira nga dy shtetas për pikë shumice për dru zjarri. Bimët narkotike kultivoheshin me anë të llampave elektrike.
Si rezultat i këtij operacioni janë shpallur në kërkim dy vëllezërit T.V., 38 vjeç dhe H.V., 47 vjeç, të dy banues në Gjirokastër.
SI ISHTE PËRSHTATUR MAGAZINA
Magazina e marrë me qira nga 2 vëllezërit ndodhet në zonën Industriale të qytetit Gjirokastër. Në magazinë u konstatuan 6 dhoma ne katin e parë të përshtatura për kultivim të bimëve narkotike me anë të llampave elektrike. Në këto dhoma u gjetën dhe u sekuestruan 28 thasë plastike me lëndë e dyshuar narkotike Cannabis Sattiva.
Gjithashtu në vendin e ngjarjes u sekuestruan në cilësinë e provës materiale pajisje elektrike për ngrohje si dhe 16 filtra për filtrimin e ajrit , paisje ventilimi , 100 llampa si dhe paisje të tjera ndihmëse të ishin në funksion të rritjes së bimës narkotike.
Gjithashtu nga policia dhe punonjësit e OSHEE-së është konstatuar dhe vjedhja e energjisë elektrike nga dy vëllezërit. Materialet i kanë kaluar Prokurorisë së Rrethit Gjyqësor Gjirokastër për veprat penale “Përdorim të paligjshëm të teknologjisë së lartë”, “Prodhim dhe shitje e narkotikëve” si dhe “Vjedhje të energjisë elektrike”.
(Boldnews)
