Operatori i Shpërndarjes së Energjisë Elektrike (OSHEE) ka pranuar zyrtarisht se e ka të pamundur të eliminojë faturimin aforfe të mijëra abonentëve, duke qenë se matësit e instaluar së fundmi pranë tyre nuk janë në gjendje të funksionojnë.
Në një shkresë dërguar Entit Rregullator të Energjisë (ERE) ditët e fundit, OSHEE deklaron se rreth 4 mijë e 600 abonentë nuk do të pajisen me sahat deri në fund të vitit për shkak se tensioni me të cilin furnizohen abonentët është 150 Volt dhe funksionimi i matësit është i pamundur. Deri në vendosjen e matësve abonentët faniljarë në Tiranë do të tarifohen 600 kw/h në muaj në qytet dhe 400kw/h në fshat.
OSHEE ka patur afatin e fundit muajin qershor për të eleminuar faturimin aforfe dhe për këtë kanë marrë angazhim si ministri i linjës, Damian Gjiknuri ashtu edhe kreu i OSHEE-së, por mesa duket për problemet që kanë të bëjnë me llogaritë e qytetarëve financimet presin, ndërsa për tenderat si ai i fundit prej 7 mln dollarë për verifikim adresash administratori Çela kujdeset që të kryhen në kohë.
