Jorgo Zani, monstra që i preu kokën kushëririt të tij 12-vjeçar, i ka habitur të gjithë më sjelljet krejtësisht të ndryshme që ka shfaqur dy ditët e fundit. Në momentin kur policia ka hyrë në banesën e tij për ta arrestuar, ai i është kundërpërgjigjur duke i gjuajtur me thika dhe hanxharë, që i kishte përdorur më parë për masakrimin e 12-vjeçarit, por para gjykatës ai u shfaq tërësisht i qetë, duke mos paraqitur asnjë çrregullim në sjellje.
Paraqitja para togave të zeza i qetë, pa shenja nervozizmi, madje pa bërë asnjë deklaratë i Jorgo Zanit, ka ngritur pikëpyetje për çrregullimet mendore. Sipas ekspertëve ky shihet si një rast unikal, dhe do të duhen studime për të konfirmuar nëse ai është i sëmurë mendor, apo ka çrregullime instinktesh. Gjykata ka caktuar një komision mjekësh psikiatër që të vlerësojnë gjendjen e Zanit.
Prokuroria e Vlorës bëri të ditur se do të pritet ekspertiza psikike e 30-vjeçarit dhe më pas hetimi për këtë ngjarje do të shtrihet edhe tek mjekët e Spitalit Psikiatrik të Vlorës, të cilët kanë përcaktuar si diagnozë “çrregullimin e personalitetit si pasojë e konsumit të lëndëve narkotike” dhe e kanë lejuar të dalë nga spitali me firmën e të atit.
Kur gjykata e Vlorës po jepte vendimin për të, Jorgo Zani ishte shumë i qetë.Ai e mbajti kokën gjatë gjithë kohës ulur, ndërkohë që dëgjonte me vëmendje vendimin e gjykatës. Autori i masakrës nuk u shfaq aspak i penduar në seancën e masës së sigurisë.
Por krejtësisht i ndryshëm ka qënë reagimi i Zanit gjatë kohës që merrej në pyetje. Përfaqësuesi i prokurorisë ka deklaruar se i akuzuari e ka pranuar autorësinë e krimit dhe se gjatë kohës që është marrë në pyetje rrinte duke qeshur. Ekspertizë psikike, e urdhëruar nga Prokuroria e Vlorës do të përcaktojë përgjegjshmërinë ose jo të vrasësit për veprimet që ka kryer.
Nëse Zani shpallet mendërisht i shëndoshë, ai atëherë do të marrë dënim me burgim të përjetshëm, në të kundërt, do të dënohet për vrasje në rrethana cilësuese.
