Avokati Arjan Kalaja u dënua me dy vite burg në maj të vitit 2016, pasi u provua se i dërfonte mesazhe gjyqtarit të Gjykatës së Lartë, Admir Thanzës. Në këto mesazhe, avokati hiqej si një person që kishte qenë dëshmitar në dhënien e 8 mijë eurove për një çështje në Velipojë, duke e kërcënuar gjyqtarin se do ta denonconte në media. Panorama zbardhi mesazhet që avokati i dërgonte gjyqtarit të Gjykatës së Lartë në vitin 2013.
SMS i parë
Referuar vendimit të Gjykatës në datën 4 dhjetor 2013, në numrin celular të gjyqtarit të Gjykatës së Lartë, Admir Thanza, kanë mbërritur dy mesazhe. SMSnë e parë e ka marrë në orën 10:50. Mesazhi ishte nisur nga një numër i panjohur celular, +3556xxxxx537. Në përmbajtjen e mesazhit shprehej kërkesa kërcënuese e dërguesit, i cili i kërkonte nëpërmjet SMS-së një vlerë monetare prej 8 mijë dollarësh amerikanë, që, sipas tij, pretendonte se ia kishte dhënë të dëmtuarit nëpërmjet shtetasit Arjan Kalaja disa ditë më parë. Sipas dërguesit, paratë ishin dhënë me qëllimin “me ba atë gjyqin e Velipojës”. Dërguesi shkruante se kishte qenë prezent kur të dëmtuarit i ishin dhënë vlerat monetare nga shtetasi Arjan Kalaja dhe njëkohësisht paralajmëronte të dëmtuarin se, në rast të mosdorëzimit të shumës, ai do ta denonconte tek emisioni investigativ “Fiks Fare”.
SMS i dytë
Në vijim, në orën 11:15 të po asaj dite, nga i njëjti numër celular ka ardhur një SMS tjetër e dytë, e cila në përmbajtje shprehej: “Po te tham edhe i her se ta kam than gabim i ke marre 8000 dollar e jo tetdhetmi”. Në këto kushte, i dëmtuari është ndier i kërcënuar dhe është paraqitur në Prokurori dhe ka bërë kallëzimin përkatës. Ndërkohë që është regjistruar kallëzimi penal dhe hetimet kanë vijuar, ai dhe familja e tij janë ndier të kërcënuar dhe si rezultat kanë marrë masat përkatëse që edhe fëmijët të shoqëroheshin vazhdimisht për në shkollë dhe kur ktheheshin prej saj.
SMS i tretë
Me datë 13 dhjetor 2013, në telefonin e gjyqtarit Thanza ka shkuar një SMS tjetër, por tashmë nga një numër i ndryshëm nga i pari, përsëri i panjohur. Dërguesi i shkruante në mesazh se nuk kishte harruar në lidhje me shumën prej 8000 dollarësh dhe e kërcënonte të dëmtuarin me një tekst të shkruar në dialektin e zonës së Shkodrës: “Ti mor zatni mas kujto se e kam lan njat punen e atyne pareve 8000 dollar qe ti kena dhan ose ti marr ose desim te tan pranaj bjeri ma mir vete ti se te fiksfarja je tu dal”.
Dënimi prej dy vitesh burg u pezullua duke e lënë avokatin në liri me kusht për një periudhë 2 vjeçare. Aktualisht, dosja ndodhet në Apelin për Krimet e Rënda, ku është ankimuar nga ana e avokatit Kalaja, ndaj vendimi ende nuk ka formën e prerë.
