Këshilltari i zëvendëskryeministrit të Kosovës, Fatmir Limaj, Luan Maloku është plagosur sot në orët e pasdites në Veternik të Prishtinës. Pas plagosjes, gjendja e Malokut është jashtë rrezikut për jetë.
Sipas policisë, dy njerëz të afërm të Luan Malokut, janë të dyshuar në këtë rast, konkretisht vëllai dhe babai i ish-gruas.
Mediat raportojnë se Maloku është ndarë së fundmi nga bashkëshortja e tij dhe si të dyshuar për plagosjen janë O.G dhe U.G, familjarë të ish-gruas së Malokut.
Policia e Kosovës ka treguar se ka arrestuar njërin nga të dyshuarit e rastit në fjalë.
Pas arrestimit është konfiskuar edhe arma e cila dyshohet se është përdorur në rast.
Policia e Kosovës ka bërë të ditur se janë duke punuar intensivisht për zbardhjen e rrethanave të plota.
