Kryetari i PD-së, Lulzim Basha, ndërsa prej disa javësh ndodhet në terren ku takon nga afër familjet e prekura nga dëmet që la pas tërmeti i 26 nëntorit, sot pasdite do të zhvillojë një takim me ish deputetët e PD dhe anëtarët e Kryesisë që gjithashtu kanë pasur kontakte në terren me qytetarët.
Në një mesazh dërguar ish deputetëve dhe anëtarëve të kryesisë, që ka siguruar Panorama, kërkohet që të pranishëm në këtë takim të jenë edhe drejtuesit politikë të partisë në disa qytete.
“Anëtarët e Grupit Parlamentar dhe të Kryesisë që kanë qenë në terren gjatë këtyre ditëve, sot në oren 18:00 mbledhje në seli me Kryetarin Basha. Gjithashtu, në takim duhet të jenë edhe Kryetarët e Degëve Durrës, Krujë, Fushë-Krujë, Laç, Lezhë, Kavajë, Vorë, Tirana 4, 6, 8, 12, 14 dhe 15 dhe Kryetarët tanë të bashkive Lezhë, Vorë, Kamëz dhe Kavajë”, thuhet në mesazhin e Bashës.
