Peter Zingraf, ambasadori i Gjermanisë në Tiranë, ka zhvilluar një takim me Prokurorin e Përgjithshëm, Olsian Çela, i cili mori zyrtarisht detyrën fundjavën e kaluar.
Në një njoftim në faqen zyrtare në rrjetin sociale, Ambasada gjermane thotë se Zingraf e përgëzoi Çelën për detyrën e re.
“Gjermania, së bashku me Bashkimin Evropian, ka mbështetur gjithmonë zbatimin e reformës në drejtësi në Shqipëri dhe do ta vijojë të bëjë këtë edhe në të ardhmen.
Zgjedhja e Prokurorit të Përgjithshëm përmes parlamentit pas verifikimit dhe vlerësimit të kandidatëve nga Këshilli i Lartë i Prokurorisë është një hap thelbësor në zbatimin e reformës në drejtësi dhe do të konsolidojë besimin e qytetarëve në sistemin e drejtësisë.
I uroj Prokurorit të ri të Përgjithshëm shumë forcë dhe suksese në detyrën e tij të rëndësishme”, thuhet në njoftimin e Ambasadës gjermane.
