Sipas raportimeve të mediave italiane dhe angleze pritet që Napoli të shkarkojë Carlo Ancelottin, nëse dështojnë të fitojnë ndeshjen e sotme përballë Genk.
Lamtumira, në fakt, ndihet edhe në fjalët e trajnerit në konferencën për shtyp para sfidës me belgët dhe nga disa informacione jozyrtare.
Ancelotti ndodhet nën presion të madh, pasi skuadra napolitane ndodhet në krizë të thellë, ku ka nëntë ndeshje në të gjitha kompeticionet që nuk arrin të fitojë.
Sipas “The Sun”, nëse tekniku italian largohet nga Napoli, e ardhmja e tij do të jetë në Londër, ku do të marrë drejtimin e Arsenalit.
Ndërsa për zëvendësimin e tij tek Napoli përflitet për Gennaro Gattuson. Fillimisht Gattuso do të jetë trajner i përkohshëm, por nëse gjërat shkojnë siç duhet në pjesën e dytë të sezonit atëherë do të fitojë kontratën për sezonin e ardhshëm.
