Një shtetas grek, i shpallur në kërkim nga autoritetet shqiptare, u ekstradua nga Danimarka drejt Tiranës.
46-vjeçari grek, D.Th, akuzohet për krijimin e skemave mashtruese lidhur me tatimin mbi TVSH, dhe ndaj tij Gjykata e Shkodrës, vendosi masën e sigurisë “burg pa afat”.
Sipas një burimi zyrtar nga Policia e Shtetit, Interpol Tirana falë bashkëpunimit me Interpol Kopenhagen/Danimarkë, ekstradoi nga Danimarka drejt Shqipërisë, shtetasin grek D. Th., 46 vjeç.
“Ky shtetas është person i shpallur në kërkim ndërkombëtar, pasi Gjykata e Rrethit Gjyqësor Shkodër ka caktuar ndaj këtij shtetasi masën e sigurisë “Arrest me burg” për veprat penale “Krijim i skemave mashtruese lidhur me tatimin mbi vlerën e shtuar kryer në bashkëpunim”, “Fshehje e të ardhurave“, “Mospagim i taksave dhe tatimeve” dhe “Falsifikim i dokumentave”.
Shtetasi grek D. Th., në bashkëpunim me shtetasin shqiptar K. M., dhe dy shoqëri, kanë organizuar dhe vënë në funksionim një skemë mashtruese me qëllim për të përfituar rimburësim të vlerave të TVSh duke krijuar shoqëri fiktive. Vlera e aseteve që u transferuan është 4 milion euro, ndërsa vlera e veprimtarisë ekonomike që u transferua është 1.9 milion euro”, thuhet në njoftimin zyrtar të policisë.
