Natën e 8 dhjetorit 1990, rreth 300 studentë nisën atë që më vonë u quajt Lëvizja Studentore 90-tës. Ata të organizuar marshuan nga Qyteti Studenti drejt qendrës së Tiranës. Pas protestave të cilat vazhduan disa ditë, ata u takuan me Ramzi Alinë, aty ku u konfirmua edhe pluralizmi politik, të cilin e shpallën menjëherë pas kthimit nga ai takim, duke nisur edhe organizimet për themelimin e Partisë Demokratike.
Sot, kjo përkujtohet çdo vit në Shqipëri si Dita e Rinisë. Sot, mbushen 29 vjet nga Lëvizja Studentore e Dhjetorit dhe ka ardhur dhe një reagim nga kreu i Forumit Rinor të PD-së, Belind Këlliçi.
Në një postim në rrjetin social në Facebook, ai shprehet se i është mirënjohës brezit të shkuar të studentëve, që me forcë dhe kurajo i dha goditjen përfundimtare totalitarizmit në Shqipëri.
Postimi i plotë:
Sot kujtojmë ditën kur studentët e Dhjetorit 1990 u ngritën në protesta dhe revolta duke rrëzuar sistemin totalitar në Shqipëri. Fryma që lëvizja studentore solli në 8 Dhjetor, bëri që lëvizjes t’iu bashkoheshin edhe pedagogë dhe njerëz të tjerë. Kërkesat e tyre u pranuan nga Ramiz Alia, duke i hapur rrugën pluralizmit politik dhe lirisë së fjalës.
Ne i jemi mirënjohës brezit të shkuar të studentëve, që me forcë dhe kurajo i dha goditjen përfundimtare totalitarizmit në Shqipëri. Gëzuar Ditën e Rinisë!
