“Këshilli Bashkiak i Bashkisë Durrës vendos në mbledhjen e sotme miratimin e bonusit të qirasë për 660 familjet e para që kanë aplikuar pranë Bashkisë Durrës”, deklaroi sot zv/ministrja e Brendshme, Rovena Voda.
Në raportimin e orës 13:30 nga zyra e Drejtuesit Qendror të Operacioneve për Menaxhimin e Fatkeqësive Natyrore, Voda theksoi se, “vlera e pagesës së qirasë mujore do të jetë në varësi të madhësisë së familjes, tipit të banesës dhe nivelit të çmimit mesatar në treg”.
Ajo nënvizoi se, “çdo familje që dëshiron të aplikojë prej këtej e në vijim për përfitimin e bonusit të qirasë, duhet të dorëzojë pranë bashkisë vërtetimin nga njësia administrative/lagjja që banesa rezulton e pabanueshme; Akt Konstatimin nga Instituti i Ndërtimit ku të përcaktohet si godinë e pabanueshme, ose për t’u prishur (dokument i disponueshëm pranë Bashkisë Durrës/njësisë administrative përkatëse); Çertifikatën familjare, dhe të dhënat e llogarisë bankare”.
“Të gjithë qytetarët e interesuar janë të lutur të dorëzojnë dokumentacionin e sipërpërmendur dhe të plotësojnë formularin e aplikimit pranë Bashkisë”, tha Voda.
Ndërkohë, Voda konfirmoi “që në Bashkinë Tiranë janë aprovuar 922 Bonuse Qeraje, nga të cilat 554 janë shpërndarë dhe deri tani 5 familje janë akomoduar në banesa me qera”.
Sa i përket përditësimit të informacionit përmbledhës për Qarkun Tiranë, Voda tha se, “deri në datën 6 dhjetor sa i përket dëmve nga tërmeti në njerëz, 1 qytetar ka humbur jetën, 44 qytetarë janë të dëmtuar, 3396 qytetarë të evakuuar, 1016 qytetarë të strehuar çadra, 395 qytetarë në qendra sociale, 117 kërkesa të qytetarëve drejtuar prefectures”.
Sa i përket dëmtimeve materiale në banesa dhe infrastrukturë, Voda tha se, “janë 7077 konstatime të kryera gjithsej. Nga këto 728 konstatime te kryera në palate, 6349 konstatime te kryera ne banesa”.
Voda theksoi se, “810 banesa janë të pabanueshme, 1937 banesa të dëmtuara rëndë, 4026 banesa të dëmtuara lehtë, 69 pallate të pabanueshme, 132 pallate të dëmtuar rëndë, 530 pallate të dëmtuar lehtë, 1 qendër shëndetësore e dëmtuar, 106 biznese të dëmtuara , 32 shkolla të dëmtuara. Ndërsa në shkollën “Ismail Qemali” u mbyll sot palestra në të cilën ishin strehuar 2 familje”.
Voda shtoi se, “Bashkia Tiranë është furnizuar me 350 çadra verore. Në Bashkinë Kamëz janë 12 grupe pune për verifikimin e dëmtimeve në zonën e Kamzës, Bathores, Paskuqanit. Janë verifikuar 25 shkolla, nga të cilat, 1 ka dalë jashtë funksionit; 2 të dëmtuara rëndë; 15 të dëmtuara lehtë. Janë verifikuar 20 kopshte, nga të cilat 4 janë jashtë përdorimit; 1 dëmtuar rende; 4 dëmtuar lehtë. Në Bashkinë Kavajë: 5 grupe pune që veprojnë në terren. Në Bashkinë Rrogozhinë aktualisht janë 4 grupe verifikimi në terren për qytetin e Rrogozhinës dhe 1 grup verifikimi per Njësinë Administrative Sinaballaj”.
Voda u shpreh se, “janë shpërndarë gjithsej 29 çadra në qendrat e njësive administrative; Sinaballaj 7 çadra, Lekaj 5 çadra, Kryevidh 8 çadra, Gose 1 çadër, Rrogozhinë 8 çadra”.
Përsa i përket shkollave të dëmtuara, Voda theksoi se, “Bashkia Rrogozhinë në bashkëpunim me Zyrën Arsimore po kryen zhvendosjen e nxënësve nga shkolla Okshtun për në godinën e shkollës Gërmenj. Nga shkolla Kryevidh për në godinën e shkollës Sterbeg. Nxënësit e shkollës Gosë dhe shkollës “Xh. Soros” në Rrogozhinë do të sistemohen tek shkollat 9-vjeçare brenda zones”.
Sa i përket situatës së shëndetësisë, Voda theksoi se, “janë 4,366 vizita të kryera në njësitë akomoduese. 1,133 qytetarë të vaksinuar me vaksinën antigrip në Durrës, Krujë, Lezhë dhe Vorë). 413 të sëmurë kronikë të strehuar në qendrat e akomodimit, të cilëve ju është mundësuar ofrimi i barnave me rimbursim. Ndërkohë, vijon me rigorozitet monitorimi i cilësisë së furnizimit me ujë të pijshëm në zonat e prekura dhe njësitë e akomodimit. Në Ishëm, Manzë dhe Prezë Kala, janë vendosur çadra për ofrimin e shërbimit shëndetësor për qytetarët, si dhe një njësi e lëvizshme ambulatore është vendosur në Vorë pranë kampit”.
Voda nënvizoi se, “deri në orën 12:00 të ditës së sotme, numri i thirrjeve të përpunuara deri tani nga gjashtë operatorët në dispozicion të qytetarëve për të tre numrat e gjelbër: 0694114100; 0694114101 dhe 0694114040 është aktualisht: 533 (Tiranë – 235; Durrës – 252; Lezhë – 44; Elbasan – 1; Shkodër – 1). Sërish, sikurse edhe gjatë dy ditëve të fundit, shumica dërrmuese prej 463 thirrjesh ka qenë për verifikim dëmesh në banesë”.
