Nga Boldnews.al
Kryeprokurorja e Përkohshme, Arta Marku, ishte pjesë e dy garave që zhvilloheshin paraditen e kësaj të Enjteje.
Ndërkohë që ajo pret votimin në Parlament për një mandat të plotë në krye të Prokurorisë, ku rivalizohet nga Olsian Çela, shorti i zhvilluar nga Presidenti i Republikës e zgjodhi atë si anëtare të Këshillit të Emërimeve në Drejtësi për vitin 2020.
Arta Marku u shortua për anëtare të Këshillit të Emërimeve në Drejtësi si prokurore e Prokurorisë së Përgjithshme. Por, nëse ajo nuk arrin të zgjidhet nga Parlamenti për një mandat të plotë në krye të institucionit të Akuzës, ajo, me shumë mundësi, do të duhet të dorëzojë edhe “mandatin” si anëtare e Këshillit të Emërimeve në Drejtësi.
Në rast se Arta Marku del e humbur në garën për Prokuror të Përgjithshëm, ajo humbet edhe statusin e prokurores pranë institucionit qendror të Akuzës.
Kushtetuta e Republikës, në nenin 148/a parashikon, ndër të tjera, se: “Pas përfundimit të mandatit dhe me kërkesë të tij, Prokurori i Përgjithshëm emërohet në detyrën e mëparshme ose gjyqtar në gjykatën e apelit”.
Arta Marku ishte prokurore e thjeshtë në Shkodër kur, nëpërmjet një procesi të kontestuar në Dhjetor 2017, u caktua si Prokurore e Përgjithshme (e Përkohshme), një koncept që nuk ekziston as në Kushtetutë dhe as në ligj.
Ajo, pavarësisht se u caktua si Prokurore e Përgjithshme, nuk gëzon statusin e prokurorit në Prokurorinë e Përgjithshme pasi, në kohën kur ajo u emërua, Parlamenti vendosi që Marku “do të caktohej për të kryer përkohësisht detyrën e Prokurorit të Përgjithshëm”.
Referuar Kushtetutës, Arta Marku, në rast se nuk zgjidhet si Prokurore e Përgjithshme për një mandat të plotë, atëherë ajo mund të zgjedhë që të ushtrojë funksionet ose ku ka qenë më parë (në Prokurorinë e Shkodrës) ose si gjyqtare Apeli (emërimi kryhet nga Këshilli i Lartë Gjyqësor në vendet vakante në rang Apeli).
Pra, rezulton se Arta Marku as nuk ka statusin e prokurorit të Prokurorisë së Përgjithshme dhe as nuk mund të ushtrojë detyrën në selinë qendrore të Akuzës, nëse Parlamenti nuk voton emrin e saj si Kryeprokurore me mandat të plotë.
Në këtë mënyrë, ajo, si rregull, humbet mundësinë për të përfaqësuar Prokurorinë e Përgjithshme në Këshillin e Emërimeve në Drejtësi.
Gjithësesi, një largim i mundshëm i saj nga KED nuk e pengon përfaqësimin e Prokurorisë së Përgjithshme në atë strukturë.
Shorti i zhvilluar nga Presidenti përzgjodhi edhe anëtarin zëvendësues nga Prokuroria e Përgjithshme. Ai është Bilbil Mete, një prokuror me karrierë të gjatë, e nisur që para viteve ’90. Ai është gjithashtu babai i Ervin Mete, ish-zëvendësministër i Financave në mandatin e parë të kabinetit “Rama” dhe aktualisht Kryetar i Bordit të Autoritetit të Mbikqyrjes Financiare (AMF).
