Pajisjet që ky i ri mbante në dorë, i treguan policisë se ai sapo kishte vjedhur kabllo elektrike të OSHEE-së në lagjen “Pavarësia” në Vlorë . Policia mori njoftim për vjedhjen dhe nga kontrolli i kamerave të sigurisë, u zbuluan dy persona që kishin vjedhur kabllot elektrike. Ata janë arrestuar mbrëmjen e djeshme, ndërkohë që ishin të dënuar më parë për vjedhje dhe shitje narkotikësh.
Njoftimi i policisë
Finalizohet operacioni i koduar “Elektriku”.
Shkatërrojnë rrjetin elektrik duke vjedhur disa herë kabllo elektrike, Policia vë në pranga autorët.
Specialistët e hetimit të krimit pranë Komisariatit të Policisë Vlorë, në vijim të punës për zbardhjen e vjedhjeve të kryera në qytet, kanë bërë dokumentimin e disa ngjarjeve, ku së fundmi ka rezultuar se mëngjesin e djeshëm, në lagjen “Pavarësia”, Vlorë, janë vjedhur disa metra kabllo elektrike në kabinën elektrike të OSHE-së dhe janë dëmtuar instalimet elektrike.
Menjëherë pas hetimeve intensive, u bë identifikimi i autorëve nga Policia dhe kapja e arrestimi i tyre, konkretisht:
• F. J., 37 vjeç, banues në Vlorë (i dënuar më parë për vjedhje dhe prodhim e shitje narkotikësh).
• E. S., 27 vjeç, me banim në Vlorë (i dënuar më parë për vjedhje).
Gjithashtu, në vijim të veprimeve të mëtejshme Policia ka zbuluar se shtetasit e mësipërm, në bashkëpunim me njëri-tjetrin, dyshohet se janë autorë të 4 vjedhjeve dhe dëmtimeve të kabinave elektrike në qytetin e Vlorës, konkretisht si më poshtë:
1. Më datë 12.01.2019, në kabinën elektrike të lagjes “Hajro Çakërri” dyshohet se kanë vjedhur një pjesë të kabllos elektrike.
2. Më datë 13.09.2019, në një kabinë elektrike të lagjes “Kushtrimi” dyshohet se kanë vjedhur 16 m kabllo elektrike.
3. Më datë 18.11.2019, në kabinën elektrike pranë “Halim Xhelos”, dyshohet se kanë vjedhur 5 m kabllo elektrike.
4. Më datë 25.11.2019, në kabinën elektrike të lagjes “11 Janari”, dyshohet se kanë vjedhur 6 m kabllo elektrike.
Materialet iu referuan Prokurorisë, në ngarkim të tyre, për veprat penale “Vjedhja” dhe “Shkatërrimi i rrjetit elektrik”, të kryera në bashkëpunim.
