Barcelona mposhti bindshëm Borussia Dortmund me rezultatin 3-1, ndërkohë me po të njëjtin rezultat Interi, triumfoi në transfertë ndaj Slavia Pragës.
Për skuadrën e Barcelonës ishte një natë perfekte, pasi shënuan të gjithë sulmuesit kryesorë, Messi Suarez, Griezmann, duke siguruar jo vetëm kualifikimin matematikor por edhe vendin e parë në grupin F.
Me anë të fitores ndaj Slavias së Pragës, Inter i Contes ngjitet i dyti në këtë grup duke zbritur në vendin e tretë Borussian e Dortmundit.
Dyshja Lautaro Martinez-Lukaku vazhdojnë të shkëlqejnë pasi shënuan të tre golat e takimit,argjentinasi në minutat 19-të dhe 88-të, ndërsa Lukaku shënoi në minutën e 81-të.
Grupin F e kryeson Barcelona në kuotën e 11 pikëve, ndërsa ndjekin Interi dhe Dortmundi me nga 7 pikë, ku duhet theksuar që ndeshjen e fundit, Interi e luan ndaj Barcelonës në “San Siro”, ndërsa Dortmundi ka një sfidë të lehtë në letër ndaj Slavia Pragës në shtëpi.
