Tirana luan nesër në transfertë ndaj Skënderbeut.
Përpara kësaj ndeshje, trajneri bardheblu, Julian Ahmataj, doli sot në konferencë për shtyp ku foli për rëndësinë e një rezultati pozitiv në këtë ndeshje, si dhe për gjendjen në përgjithësi të skuadrës.
I pyetur për ndërprerjen e kampionatit dhe çfarë ndikimi do të ketë te ekipi i Tiranës, ai u përgjigj:
“ Pushimi na ka shërbyer shumë, por gjërat nuk janë aq të thjeshta sa duken nga jashtë. Te Tirana krijohet një tullumbace, sikur ne do të bëjmë namin me Skënderbeun. Ne nuk jemi në këtë situatë, shumë lojtarë nuk janë stërvitur, disa lojtarë ishin me kombëtaret. Do të japim maksimumin dhe pastaj do shohim ku jemi. Asnjë nga ne nuk pretendon që në pak kohë të ndërtojmë një skuadër brilante”.
Ndërsa në lidhje me pritshmëritë e kësaj ndeshje, ai deklaron që i vetmi rezultat që e kënaq ekipin e Tiranës është fitorja.
“Hyjmë në këtë ndeshje vetëm për të fituar. Ky është objektivi që ka pasur, ka dhe do të ketë ky klub. Nuk ka justifikime për rezultatet. Për rezultatet mbaj vetëm unë përgjegjësi, jo futbollistët. Ata duhet të japin maksimumin në fushë, këtë duhet të bëjnë. Përgjegjësia e rezultateve duhet të hiqet nga ata, pasi rrit presonin”.
Ndeshja mes Skënderbeut dhe Tiranës luhet nesër, ora 16:30.
