Presidenti i Republikës, Bujar Nishani ka paralajmëruar një bllokim të reformës në drejtësi, për shkak të mosllogaritjes së afateve.
Presidenti ka afat deri më 16 gusht që të propozojë 9 anëtarët e Këshillit të Emërimit të Gjyqtarëvë.
“Mirëpo, amendamenti kushtetues thotë se kriteret e emërimeve dhe propozimeve do të bëhen sipas ligjit specifik, i cili nuk është miratuar ende nga Kuvendi”, shpjegoi Nishani.
Në këtë mënyrë, Kreu i Shtetit nuk mund ta ushtrojë dot funksionin e tij për emërimin e anëtarëve të Këshillit të Emërimëve për Gjyqësorin, pasi nuk ka të përcaktuara me ligj kriteret që gjenden në paketën e 7 ligjeve që ende nuk janë miratuar.
Por, edhe nëse votohen në seancën më të afërt, do të duhen 15 ditë që të hyjnë në fuqi, çka e tejkalon datën 16 gusht që përcakton Kushtetuta për ushtrimin e detyrës së Presidentit të Republikës.
Unë kam mbajtur kontakte me Kuvendit për këtë çështje. Kam thirrur në një takim krerët e grupeve parlamentare të martën në orën 11 për ta diskutuar këtë problematikë”, tha Nishani. Në rast se ky afat tejkalohet, atëherë i takon Kuvendit kompetenca për ngritjen e institucionit në fjalë. Kryetari i Kuvendit do të ketë plot 10 ditë afat për ngritjen e institucionit dhe emërimin me short të anëtarëve të Këshillit të Emërimeve në gjyqësor.
Presidenti i Republikës theksoi se reforma në sistemin e drejtësisë një domosdoshmëri pa alternativë. Ai deklaroi se kjo reformë do të largojë të paaftët dhe të korruptuarit dhe se qytetarët presin që politikanët e korruptuar të dalin para ligjit sa më shpejt.
“Kam parë edhe kam këmbëngulur që procesi të përfundonte me konsensusin e të gjitha palëve. I kam vlerësuar të gjitha palët që ofruan kompromis dhe konsensus. Zbatimi i kësaj reforme afatgjatë dhe duhet të mbahet larg nga beteja politike. Ky proces do të sjellë një konsolidim më të madh të trupës gjyqësore dhe njerëzve profesionistë që janë brenda këtyre trupave. Do të shmangë dhe do të largojë të paaftët dhe të korruptuarit. Ajo që duam dhe që duan shqiptarët është që të shohim sa më parë para ligjit politikanë e korruptuar dhe sekuestrimin e pasurive të tyre. Këtë e duan shqiptarët. Presidenti i angazhuar për të denoncuar shmangien nga kushtetuta dhe integritetit ashtu edhe i denoncimit të rasteve të korrupsionit dhe inkriminimit”, tha Nishani.
