Kryetari i KED-së, Ardian Dvorani, i është përgjigjur sot Presidentit Ilir Meta lidhur me kallëzimin penal që ka depozituar një ditë më parë në 3 prokurori.
Dvorani tha në studion e “Top Talk” në “Top Channel” se ne duhet të respektojmë Kushtetutën dhe ligjin dhe duhet t’i drejtohemi institucioneve.
“Presidenti në rastin konkret respektoi të drejtën e tij dhe iu drejtua Prokurorisë duke bërë një kallëzim. Mendoj se kjo akuzë apo ky kallëzim është mbështetur në të vërteta dhe të pavërteta të dukshme.
Meta thotë se unë nuk kam respektuar parashikimet e Kushtetutës, por ky është një argument i gabuar dhe si i tillë bën që e gjithë pjesa tjetër bie, rrëzohet, pasi ka një interpretim të gabuar.
Në rastin konkret unë s’mund të ngarkohem me kallëzim penal”, tha Dvorani.
Lidhur me faktin se Presidenti ka depozituar kallëzimin në 3 prokurori, Kreu i KED-së, tha se nuk ka parë deri më sot një praktikë të tillë, pra që një kallëzim të depozitohet në 3 apo 4 prokurori njëherazi.
“Institucionet e dinë se ku duhet të depozitohet kallëzimi, një gjë të tillë mund t’a bëjnë qytetarët që s’kanë informacione, por jo institucionet”, tha Dvorani.
Ai tha se i takon prokurorisë që të vlerësojë kallëzimin, duke shtuar se ka vetëm 1 prokurori të vetme që ka kompetencën, s’mund të ketë dy apo 3 që të kenë kompetencën për të bërë vlerësimin.
“Unë jam personi i akuzuar, ndaj s’mund të bëjë komente, pasi çfarë do që të them unë do të paragjykohet”, tha Dvorani.
Ai shtoi se prokurori ose prokurorja nuk duhet të mendohet fare se kush është kallëzuesi, kush është i kallëzuar, ai duhet të respektojë procedurën dhe ligjin.
Dvorani është pyetur lidhur me përplasjet e krijuara me Gjykatën Kushtetuese, ndërsa tha se Kushtetuta është shumë e qartë: Kushtetuesja ka 9 anëtarë, 3 i zgjedh Presidenti, 3 Kuvendi dhe 3 Gjykata e Lartë, nga një listë emrash që kualifikohen nga KED.
“Kushtetuta ka bërë një zgjedhje të re, ju jeni 3 institucionet që zgjedhin anëtarët, por kualifikimet dhe renditja e tyre bëhet nga KED.
Kushtetuta përcakton se anëtarët zgjidhen nga 3 anëtarët e parë, nuk ka të 4-ërt, të 5-të apo të 6-të”, tha Dvorani.
