Policia identifikon viktimën i cili u gjet i dëmtuar paraditen e sotme rreth gjysmë milje larg bregut të detit të Himarës dhe ndërroi jetë në Spitalin e Himarës për shkak të plagëve të rënda.
Sipas të dhënave zyrtare, viktima është Denis Kaiumov, 43 vjeç, banues në Saint Petersburg, Rusi.
Policia thotë se 43-vjeçari ka qenë duke pushuar në këtë zonë bregdetare nën shoqërinë e bashkëshortes dhe vajzës së tij.
Ngjarja ndodhi paraditen e sotme, rreth orës 11:40 ku një mjet ujor, dyshohet skaf i ka kaluar sipër viktimes, duke i shkaktuar prerje të mëdha në trup, si dhe ka humbur njërën gjymtyrë. Ai është dërguar menjëherë në spital, por nuk mundi të mbijetojë.
Ndërsa, mjeti që e ka goditur është larguar nga vendngjarja.
Njoftimi i policisë
Rreth orës 11:40, midis Himarës dhe Livadhit është parë një person i dëmtuar brenda në det (rreth 50 m larg bregut) dhe me ndihmën e një skafi është nxjerrë në anë të detit, nga ku është marrë dhe është transportuar menjëherë në Spitalin e Himarës, vend në të cilin ka nderruar jetë.
Nga kqyrja që i është bërë trupit të viktimës ka rezultuar se ka marrë dëmtime në pjesën e shpinës dhe të gjymtyrëve.
Gjeneralitetet e viktimës ende nuk janë bërë të ditura, por dyshohet se mund te jetë rreth 40-50 vjeç dhe se mund të jetë shtetas i huaj.
Paraprakisht dyshohet se mund të jetë goditur nga ndonjë mjet i shpejtë lundrues, i cili është larguar menjëherë nga vendi i ngjarjes.
Policia e Vlorës në bashkëpunim me Policinë Kufitare, po punojnë për dokumentimin e plotë të ngjarjes si dhe për përcaktimin e shkaqeve të saj.
