Nënkryetari i LSI, Petrit Vasili shprehet se shkeljet e kreut të KED-së, Ardian Dvorani, janë flagrante dhe për ato duhet të përgjigjet në gjykatë. Përmes një reagimi në rrjet, Vasili shkruan se “çdo shqiptar e sheh që Dvorani është kapur me presh në dorë, por ky thotë që preshi nuk është edhe aq i madh”.
“Dvorani dhunon ligjin dhe boton në mënyrë të paligjshme në Fletoren Zyrtare (Landfillin zyrtar) lista të botuara në faqen zyrtare të Gjykatës së Lartë për t’i bërë hysmet propagandës.
Në mënyrë të paligjshme bllokon dhe nuk publikon përmbledhjet e procesverbaleve, siç ja kërkon ligji sepse transparencën, rilindja e urren.
Çon listat e kandidateve në mënyrë të paligjshme siç ja urdhëron rilindja që të kapë Gjykatën Kushtetuese ca më përpara Presidentit, ca më pas Kuvendit dhe me tufa dy nga dy kundër Kushtetutës e ligjit.
KED merr vendime të mos diskutojë për pezullimin e drejtë të Presidentit, ndërsa Dvorani manipulon e gënjen sikur KED kishte marrë vendim dhe boton lista. Çdo shqiptar e sheh që Dvorani është kapur me presh në dorë, por ky thotë që preshi nuk është edhe aq i madh”, shkruan Vasili.
