Kapiteni legjendar i Shqipërisë, Lorik Cana, në një intervistë të dhënë për “Ouest France”, ka folur për përballjen mes Shqipërisë dhe Francës, ku i ka garantuar francezëve “fair play” dhe një ndeshje pa vërshëllima dhe se incidenti me himnin tonë kombëtar në Francë i përket të së kaluarës.
“Për mua është një sfidë speciale, që vë përballë vendin tim, me atë që kam luajtur për klube rreth 10 vjet. Në aspektin sportiv, nuk ka shumë interes, por është sfidë e veçantë, pasi po inaugurojmë stadiumin e ri. Do të ketë një ceremoni me shumë ish-futbollistë të Shqipërisë të pranishëm, ku do të jem edhe unë”.
“Unë isha në stadium ndeshjen e parë, që u ngatërrua himni. Ishte një episod i pakëndshëm për ne. Por, mbaroi aty. Të dy kombet kanë marrëdhënie të mira, por në Shqipëri kemi sensin e mikpritjes. Nuk pres vërshëllima gjatë himnit, do respektohet Franca”.
