Nënkryeministri Erion Braçe ka reaguar ndaj paralajmërimit të Presidentit Ilir Meta, sipas të cilit Parlamenti mund të shpërndahet me një dekret, nëse nuk zbatohet Kushtetuta.
Debati mes Presidentit dhe Kuvendit u shkaktua lidhur me caktimin e anëtarëve të rinj të Kushtetueses, ku Presidenti ka dekretuar si anëtare Marsida Xhaferllarin, ndërsa KED dhe Rilindja njohin si anëtare Arta Vorpsin.
Pas seancës së jashtëzakonshme parlamentare, Braçe u shpreh se Presidenti mund t’a shpërndajë Kuvendin, por kujt do i referohet.
“Me qejf çdo berber mund të dalë ta shpërndajë parlamentin por kujt i referohet, rregullave të berberhanes apo rregullave të shtetit. Hyni shikoni a ka të drejtë ose jo”, u shpreh Braçe.
Ndërkohë, Presidenti më parë deklaroi “askush të mos guxojë të përdhosë Gjykatën Kushtetuese, është institucioni më i rëndësishëm i këtij vendi. Parlamenti me një dekret të shpërndahet, qeveria me një mocion mosbesimi rrëzohet, Presidenti përsëri shkarkohet nga Gjykata Kushtetuese e Shqipërisë”.
