Presidenti Ilir Meta artikuloi këtë të mërkurë se kryetari i KED, Ardian Dvorani u përdor qëllimisht nga persona të caktuar brenda mazhorancës. Deklaratën, kreu i shtetit e bëri gjatë një konference për mediat nga Presidenca, ku foli për dekretimet për Gjykatën Kushtetuese.
“Ndërtimi i Gjykatës Kushtetuese nuk duhet të bëhet sipas lojërave të KED. Unë të hënën u detyrova të bëj një postim ku i kam thënë Kuvendit, ju lutem ju plotësoni vendet tuaja dhe unë brenda 24 orëve të plotësojë vakancën tjetër. Unë e bëra këtë që Kuvendi të plotësonte në mënyrë të përgjegjshme vakancën e dytë. Por ata vepruan ndryshe dhe kjo është përgjegjësi e tyre. Unë jam i detyruar të marrë përgjegjësitë e mia”, tha Meta.
Pyetje: Ju e lexuat Kushtetutën, por nuk e lexuat të gjithë parashikimin. Është Presidenti, Parlamenti dhe Gjykata e Lartë…Duket se nuk jeni shumë korrekt…
Meta: Unë jam shumë korrekt, sepse Kushtetuta thotë shumë qartë se vakancën e parë e plotësin Presidenti, të dytën Parlamenti dhe të tretën Gjykata e Lartë dhe kjo përsëritet. Është e shprehur drejtë që Presidenti nuk mund të bëjë shpalljen e dy vakancave njësoj. Jemi në momentin që kemi katër vakanca për të cilat duhet luajtur pikërisht balanca dhe logjika e Kushtetutës. Kur ti si KED bën një proces dhe nga ky proces dalin shumë pak emra, atëherë çdo zgjedhje që bënë presidenti ndikon tek listat e Kuvendit. Pastaj mund të fajësohet Presidenti. Kjo është shumë e qartë dhe nuk e luan topi. Kjo logjikë në kushtet aktuale do të ndiqej. Çdo gjë tjetër është sofizëm, është marrëzi që është shumë e qartë për çdo njeri.
Pyetje: Po, por Parlamenti zgjodhi dy emrat ju i konsideruat të drejta?
Meta: Duhet të keni parasysh se ky proces, ka qenë transparent nga ana ime. Presidenti nuk e konteston faktin se Parlamenti ka pasur përgjegjësinë të zgjedh vakancën e dytë. Dhe nëse presidenti veproi menjëherë për vakancën e parë, çuditërisht parlamenti e shtyu në kohë vendimmarrjen e tij për të votuar në kohë. Kemi të bëjmë me një rrethanë provokuese për Presidentin e Republikës nga individ të caktuar të mazhorancës që kanë përdorur dhe kryetarin e KED. Kushdo që ka dëshirë ta kuptojë e kupton këtë gjë. Që Presidenti sipas mazhorancës duhej të vihej në pozitë të vështirë.
Në nisje të fjalës së tij, Meta tha se ka firmosur dekretin për emrin e Marsida Xhaferrllari si gjyqtare në Gjykatën Kushtetuese si dhe sqaroi procedurën.
https://boldnews.al/perplasja-per-kushtetuesen-meta-nuk-ka-budalla-qe-se-kupton-lojen-e-ked-pervec-nderkombetareve/
