Monika Kryemadhi, kryetare e LSI-së, e cila prej disa ditësh ndodhet në SHBA, ka reaguar lidhur me dhunën barbare të ushtruar ndaj banorëve të “Unazës së Re” nga policia.
Duke e cilësuar dhunë shtetërore atë të ushtruar ndaj banorëve të Unazës, me të gjithë barbarinë antinjerëzore e në tejkalim të plotë të kompetencave të ligjit, Kryemadhi shprehet se kjo është dëshmia e radhës së pushtetit të Edi Ramës në ortakëri me krimin dhe korrupsionin.
“Makineria qeverisëse është vënë në shërbim të klaneve kriminale, për interes të të cilave nuk kursen as dhunën ndaj qytetarëve, ndaj grave e fëmijëve të pa mbrojtur, ndaj të moshuarve dhe gjithë të tjerëve pa dallim.
Është gjithashtu edhe treguesi më i qartë se e gjithë retorika e tij për “Drejtësinë e Re” është një mashtrim, pasi drejtësia atij i duhet për të mbrojtur krimet dhe korrupsionin, ndërsa për qytetarët e pa mbrojtur dhe në nevojë ka zgjedhur dhunën dhe paligjshmërinë”, shprehet Kryemadhi.
Kryemadhi paralajmëron Ramën se do të ketë të njëjtin fund si të gjithë ata që i kundërvihen popullit të tyre.
“Në solidaritet të plotë me banorët e Unazës së Re, ju jap fjalën e zemrës me gjithë dashurinë e nënës, por edhe si Kryetare e LSI-së, se do të marrin një më një të gjithë kompensimin për dëmin e shkaktuar dhe se Edi Rama dhe e gjithë banda e tij do të përgjigjen para drejtësisë së ligjit”, thekson Kryemadhi.
