Lëvizja Vetëvendosja ka reaguar ashpër ndaj dhunës së ushtruar nga policia kundër banorëve të Unazës së Re, ku shumë qytetarë u detyruan t’i drejtohen Spitalit të Traumës për të marrë ndihmë mjekësore, dhe të tjerë janë mbajtur me orë të tëra të shoqëruar në qeli komisariatesh.
Dhuna dhe terrori nisi herët në mëngjes, ku qindra forta policore, të pajisura me skafandra, mburoja, shkopinj gome dhe gaz toksik, rrethuan zonën dhe nisën reprezaljet.
VV përmes një deklarate i ka dalë në krah banorëve të Unazës së Re, ndërsa ka dënuar dhunën policore.
Sipas VV, korrupsioni, skandalet, parregullsitë dhe standardet e dyfishta e kanë karakterizuar të gjithë procesin e projektit të “Unazës së Re”.
“Një shtet i së drejtës nuk ndërtohet përmes një pushteti arbitrar me dhunë strukturore e direkte ndaj qytetarëve. Çështja e pronave në zonën e “Astirit” duhet të zgjidhet duke përdorur një standard të drejtë e të barabartë për të gjithë qytetarët”, theksohet ne deklarate.
Por duket se kjo deklaratë e degës së Vetëvendosjes i ka prishur qetësinë Erjon Veliajt, kreut të Bashkisë së Tiranës, që nuk ka nguruar të përgjigjet. Madje, Veliaj përmes deklaratës shprehet se nuk ka kuptim që kryetarët e VV që vijnë rregullisht në Tiranë, të vazhdojnë të marrin eksperienca, kur po degradohet raporti i krijuar prej vitesh.
“Ne dimë se Vetëvendosja është votuar të qeverisë Kosovën. Bashkia e Tiranës është shpresëplotë se Lëvizja Vetëvendosja në Kosovë, pas deklaratës së pakuptimtë që bëri sot, do të jetë e aftë të reflektojë dhe të tregojë pjekuri për degët e saj, që me sa duket fatkeqësisht i kanë dalë jashtë kontrollit.
Në të kundërt, nuk ka kuptim që kryetarët e VV vijnë rregullisht në Tiranë për të marrë përvoja, kur dega e tyre lokale saboton dhe degradon këtë raport të krijuar prej vitesh në mirëbesim mes Qytetit të Tiranës e VV Kosovë!“, thuhet në reagimin e Veliajt, që këtë rradhë ka preferuar të fshihet me një reagim në emër të institucionit.
