Duke komentuar zgjedhjen nga Parlamenti të tre anëtarëve të rinj të Gjykatës Kushtetuese, duke anashkaluar Presidentin e Republikës, analisti i njohur Fatos Lubonja thotë në News 24, se kohë të këqija do të vijnë ndërsa “Rilindja” siç e cilësoi ai zgjodhi njerëzit që janë më pranë saj.
Sipas Lubonjës, nëse do të ishin ndjekur procedurat kushtetuese, Presidenti duhet të zgjidhte kandidatin e tretë, çka mund të përzgjidhej kandidatja Xhaferllari, e cila sipas tij u shmang qëllimisht nga mazhoranca.
Pjesë nga fjala e Fatos Lubonjës:
Ajo që ka ndodhur është një shkelje për mendimin tim e hapur e Kushtetutës dhe me qëllim, dhe qëllimi është i qartë: vendosja në Gjykatën Kushtetuese të dy njerëzve në Gjykatën Kushtetuese që janë më afër të Partisë Socialiste, evitimi pra i zgjedhjes së kandidates Xhaferllari. Nëse do të respektohej Kushtetuta, ku secili që sipas kushtetutës duhet zgjedhur me radhë kandidatët njëherë presidenti, Kuvendi, Gjykata e Lartë, presidentit i binte mundësia që të zgjidhte edhe Xhaferllarin. Ndërkohë që për t’i hequr këtë mundësi zgjedhje presidentit për zgjedhjen e Xhaferllarit, që konsiderohet si më afër opozitës, u bë ky operacion.
Nuk është çudi, çudi do të ishte nëse do ndodhte e kundërta. Të paktën për mua nuk është çudi. Kapja e Drejtësisë është vërtetuar edhe më herët. Psh zgjedhja e Arta Markut, e cila u paraqit e përkohshme dhe tani paraqitet si e përhershme dhe shumë vendimtare, është një nga provat që qëllimi i kësaj reforme ka qenë kapja. Ajo që e bën akoma më “çudi”, është që qeveria mbështetet në këto veprime , partia në pushtet edhe nga ndërkombëtarët dhe kjo pastaj ha debat se pse ata e mbështesin.
Me sa duket ata e kanë vendosur që të ruajnë atë fasadën që e kanë ndërtuar një gjë pozitive në Shqipëri, por sa do ta ruajnë nuk e di. Mendoj që kjo ishte shumë dramatike edhe për të ardhmen e drejtësisë në Shqipëri dhe të ardhmen e demokracisë, sepse tregon se Rilindja është në rrugën e kapjes së çdo institucioni dhe sigurisht edhe kështjella e fundit që mund të ketë mbetur institucionale, sepse opozita ka dalë nga Parlamenti, që është edhe presidenti, edhe ai po anashkalohet vazhdimisht dhe do të jetojmë kohë të këqija, por “kur të vijnë mendtë nuk t’i hanë as qentë”. Kështu thotë një fjalë e urtë.
E vërteta është ajo që thoni ju, por në rast se do të zgjedhim, midis një Gjykate Kushtetuese 5-0 për rilindjen dhe një gjykate 3-2, është më mirë një Gjykatë kushtetuese 3-2, ndërkohë që na mungojnë njerëzit vërtetë të pavarur. Unë nuk kam asnjë garanci që këto janë njerëz të pavarura, qoftë edhe për faktin se pranojnë të shkelet kushtetuta për të hyrë në Gjykatën Kushtetuese, që sikur se lexova unë në media nuk kanë marrë as pikët e duhur 60 për të hyrë në Magjistraturë. Pra, që këtu jemi qartazi në shkelje të Kushtetutës dhe në këtë aspekt, ai balancimi për të pasur nga të dyja palët është më e mirë se nga kapja e të gjithë Kushtetueses. Tek ne nuk kanë ligjin mbi të gjitha, kanë urdhrin e partisë siç është rasti i Dvoranit, që siç e dini kur ishte gjykatës në kohën që kishte procesin e Ilir Metës zgjodhi pafajësinë e Ilir Metës dhe tani për të ruajtur interesat e tij, është bërë me mazhorancën e radhës dhe kjo është shumë dramatike mendoj unë.
