Lideri i Vetëvendosjes, Albin Kurti kritikoi kryeministrin shqiptar për praninë në Samitin e Ohrit pa Kosovën në krah.
Duke folur për Report TV, ai tha se takimi i dytë ndër-rajonal nuk duhej të mbahej.
Ai tha se për shkak të problemeve mes Kosovës dhe Serbisë u shty Samiti i Parisit, ndaj mund të ishte shtyrë edhe Samiti i Ohrit. “Pra për mua ishte e gabueshme dhe pashpjegueshme ngutia që medoemos, tani, të mbahet kjo mbledhje në Ohër në kohën kur dihej që Kosova nuk do të marrë pjesë. E dyta, inicativat e këtilla rajonale duhet të llogarisin një gjë thelbësore e ky është reciprociteti i plotë politik, ekonomik dhe tregtar midis Kosovës dhe Serbisë. Pra çfarëdo inciative në rajon duhet t’i bëjë vendit parimet e reciprocitetit të cilin do ta vendos dhe zbatoj qeveria e re e Republikës së Kosovës dhe unë si kryeministër”, tha Kurti.
Në kohën kur edhe vetë brenda socialistëve ka rezerva për qasjen e Edi Ramës ndaj Serbisë, kryeministri shqiptare shënoi një përplasje frontale me të gjithë politikën kosovare një ditë më parë.
Zemërimi ndaj Ramës mund të dallohet edhe në shkrimet në media dhe komentet e postuara në rrjetet sociale.
Ish-ministri i Jashtëm shqiptar, Ditmir Bushati thotë se qasja e Shqipërisë ndaj Serbisë jo vetëm po e rehabiliton Beogradin, por edhe po e forcon në kohën kur ky vend është shumë agresiv ndaj Kosovës.
Se sa agresive vazhdon të mbetet Serbia, u duk qartë të hënën kur kryediplomati serb, Ivica Daçiç deklaroi se edhe Gana ka tërhequr njohjen për Kosovën siç tregon ky dokument.
Daçiç tha se vendi afrikan është i 16-ti që tërheq njohjen, kurse deri në fund të vitit do ketë edhe tre-katër vende që do tërhiqen nga njohja e Kosovës si shtet i pavarur.
Kosova nga ana e saj tha se Gana vazhdon të ketë ambasador dhe nuk e ka tërhequr njohjen.
