Pas delegacionit të BE-së në Tiranë, edhe Ambasada e SHBA ka reaguar lidhur me zgjedhjen e dy anëtarëve të rinj të Gjykatës Kushtetuese.
Në deklaratën e Ambasadës amerikane thuhet se SHBA mbeten të përkushtuara për të mbështetur ngritjen e një sistemi gjyqësor të pavarur dhe të ndërshëm në Shqipëri.
Ndërkohë më herët, nga opozita u denoncua mënyra sesi Kuvendi votoi sot zgjedhjen e dy anëtarëve të rinj, duke shkelur Kushtetutën, ndërsa procedi u cilësua si një hap për kapjen e Gjykatës Kushtetuese nga Rilindja.
Ambasada e SHBA në deklaratën e saj thekson se votimi i sotëm i Parlamentit çon Shqipërinë përpara në ringritjen e Gjykatës Kushtetuese, një organ jetësor për llogaridhënien dhe ekuilibrat demokratike.
“Prej votimit unanim të reformës në drejtësi në 2016-ën, institucionet shqiptare, përfshirë edhe organet e reja të pavarura të gjyqësorit, kanë punuar fort për të përmbushur vullnetin e popullit.
Votimi i sotëm i Parlamentit çon Shqipërinë përpara në ringritjen e Gjykatës Kushtetuese, një organ jetësor për llogaridhënien dhe ekuilibrat demokratike.
Shtetet e Bashkuara mbeten të përkushtuara për të mbështetur ngritjen e një sistemi gjyqësor të pavarur dhe të ndershëm në Shqipëri”, thuhet në deklaratë.
Me votimin e sotëm numri i anëtarëve të Gjykatës Kushtetuese shkon në 5 anëtarë, nga të cilët Presidenti ka caktuar vetëm njërin, Besnik Muçin. Mazhoranca socialiste e cilësoi të aprovuar kandidaturën e Arta Vorpsit, e renditur e para në pikëzimin e KED-së, megjithëse Presidenti nuk u shpreh, ndërsa kërkoi nga Kuvendi që të respektojë procedurat e përzgjedhjes.
