Gjatë një bashkëbisedimi me të rinjtë në Vlorë, kreu demokrat Lulzim Basha u shpreh se është i palidhur me krimin dhe oligarkinë, dhe këto sipas tij, do e bëjnë një kryeministër të mirë.
“Çfarë kam unë ndryshe? Është e vështirë të flasësh për veten, por e kam për detyrë ta shpjegoj, përderisa e kërkoj këtë përgjegjësi.
E kam për detyrë t’ju them se ndryshe nga ky që qeveris sot, unë nuk kam lidhje me asnjë kriminel dhe nuk jam mbështetur kurrë tek kriminelët për pushtetin tim apo të partisë sime. Përkundrazi! Ne kemi bërë një betejë 6 vjeçare kundër krimit dhe kemi fituar disa segmente të kësaj beteje, siç është përshembull ligji për dekriminalizimin, që ka nxjerrë shumë pushtettarë nga parlamenti, nga bashkitë. I fundit ishte ky i Vorës”, tha Basha, duke iu përgjigjur pyetjeve të të rinjve të pranishëm.
Në vijim ai shtoi se nuk ka asnjë lidhje me oligarkinë.
“Unë dhe partia ime kemi një plan për ta çarmatosur oligarkinë nga instrumentat me të cilat kap shtetin dhe pushtetin dhe, pastaj, vjedh dhe grabit pasuritë e shqiptarëve, siç kemi edhe është një plan për t’u marrë çdo qindarkë që i kanë marrë nga taksat tuaja dhe për t’jua rikthyer ju”, theksoi ai.
